Биылғы қыс жолдарға үлкен ауыртпалық түсіріпті. Бұл туралы Индустрия және инфрақұрылымдық даму министрлігі хабарлады. Мәселен, Қазақстандағы жолдар жыл басынан бері 500-ден көп рет жабылған екен.
2021 жылдың екі айында ауа райының бұзылуына байланысты республикалық маңызы бар автомобиль жолдарында көлік қозғалысына 539 шектеу енгізілді. 500-ге жуық көлік қар құрсауынан шығарылды. Егер тарата айтсақ, боран мен қатты жел кезінде жолда көрудің нашарлауы себебінен жол учаскелері 329 рет жабылыпты. Шектеулер 78 рет – көктайғақ, 34 рет – ауа температурасының төмендеуі, 98 рет – көршілес өңірлердегі қозғалыстың шектелуіне байланысты енгізілген екен. Жалпы, жол учаскелерінде жүруге тыйым салу жөнінен Ақмола облысы көш бастап тұр. Мұнда биылғы жылдың екі айында жолдар 111 рет жабылды. Екінші орында Шығыс Қазақстан облысы тұр: шектеулер 66 рет енгізілді. Жыл басынан бері жолаушылар мен полицейлер қар құрсауында қалған барлығы 500-ге жуық көлікке көмек көрсетті. Оның 109-ы жылы бокстерге орналастырылды. Ал 800-ден астам адам «ҚазақАвтоЖол» ЖШС жылыту пункттеріне орналастырылды. Салыстыра айтсақ, 2020 жыл басындағы 2 айда ел жолдары 676 рет жабылыпты. Автокөліктердің жүруін шектеу – мәжбүрлі, бірақ жол қауіпсіздігін қамтамасыз ететін қажетті шара саналады.Елдос СЕНБАЙ