Қарағандыда қаржы пирамидасы әшкере болды. Ұйым 77 адамды алдап үлгерген. Олар 58 миллион теңге салған. Бұл туралы Tengrinews.kz-тің хабарлауынша, полиция қаржы пирамидасын ұйымдастырушы Қарағандының Майқұдық ауданының 34 жастағы тұрғыны екенін мәлімдеген. Ол 2019 жылдың сәуірінде қылмыстық жүйе құрып, оған ақша салған адамдарға қаржысын еселендіріп беруге уәде еткен. Қылмыстық жоспарын жүзеге асыру үшін WhatsApp-та "Тәуелсіз трейдер" ("Независимый трейдер") деген топ ашқан.
"Ақшаны қолма-қол шығару үшін қаржы пирамидасын ұйымдастырушы туыстарының: әйелінің, анасының, енесінің банк карточкасын пайдаланған. Сонымен қатар, 2019 жылдың қазанынан сәуіріне дейін әкімші ретінде 50 адамды алған, олар да қаржы ұйымына ақша салған. Бәріне ақшасын еселеп қайтаратынын айтқан, алайда біраз қаржы жиналғаннан кейін жоғалып кеткен. Жәбірленушілер тарапынан алғашқы арыздар 2019 жылдың соңында түсе бастады", - деді Қарағанды облысы ПД тергеу басқармасының тергеушісі Сұңғат Хасенханов.