Соңғы 5 жылда ТМД елдеріне 200 мың азаматымыз қоныс аударған.
«Қазақстанда ішкі көші-қон қарқын алды. Бұл тұрғындардың өмір сүруі үшін неғұрлым қолайлы жағдай тапқысы келетінімен байланысты. Пандемияға байланысты көші-қон процестерінің қарқыны бәсеңдегенімен, 2020 жылы бұл көрсеткіш 2015 жылғы көрсеткіштен екі есе жоғары. Ішкі көші-қонның негізгі тартылыс нүктесі республикалық маңызы бар қалалар мен өнеркәсіптік батыс өңірлер болып отыр. Ал сыртқы көші-қонның теріс сальдосы 22 мың адамдай болады. Негізгі бағыттарды атасақ, кейінгі бес жылда ТМД елдеріне 200 мыңға жуық адам кеткен», – деді Еңбек ресурстарын дамыту орталығының Стратегия және жобалық басқару департаментінің директоры Александра Молчановская. Оның айтуынша, жастар көбінесе шетелге оқуға барып, сонда қалып қояды. Өйткені онда оқуға түсу жеңілірек әрі ҰБТ тапсыру талап етілмейді. «Кейінгі кезде кадрлардың тоқтамауы проблема ретінде көтеріліп жүр. Әрине, бұл – күрделі мәселе. Бірақ көші-қон дегеніңіз – табиғи процесс. Біз адамдарға елден кетуге тыйым сала алмаймыз. Халықтың көші-қоны әрдайым қайтымсыз процесс болады. Азаматтар елде қалғысы келсе, кешенді шаралар қажет. Яғни, барлық бағыт бойынша өмір сүру үшін қолайлы жағдайлар жасау керек», – деді .Айбике ЖАНАСЫЛ