Павлодар облысы Тереңкөл ауданына жұмыс сапары барысында партияның облыстық филиалының төрағасы Илья Теренченко бастаған «AMANAT» партиясының депутаттық фракциясының мүшелері бірқатар нысандарды аралады. Алғашқы объект Береговое ауылындағы Мәдениет үйі болды. Екі жыл бұрын өрт кезінде шатыр мен екі зал толығымен жанып кеткен бұл ғимаратты қазір толық қалпына келтіру мәселесі көтеріліп отыр. Ауылдағы тағы бір өзекті мәселелердің бірі – балабақша құрылысы. Ауылдағы ескі балабақшада бүгінгі таңда 37 бала тәрбиеленуде, бірақ бұл қажетті көлемнің үштен бірін ғана қамтиды. Береговое ауылы болашағы бар ауылдардың бірі және мүмкіндігінше ауыл үшін демеушілік көмек көрсететін 10 шаруа қожалығы жұмыс істеуде. Ал Воскресенка ауылында партиялықтар жалпы білім беретін мектепке барды, онда мектепті күрделі жөндеу мәселесі өткір тұр. Мектеп құрылған күннен бастап тұрған терезе мен есік блоктарын жаңартумен қатар шатырды ауыстыру мәселесі бар. Ивановка ауылында болса үйлерге ауызсу жеткізетін су құбыры биыл тартыла бастайды. Мердігер дайындық жұмыстарын қолға алды. Тереңкөлдегі сапар соңында аудандық депутаттармен кездесу өтті. Илья Сергеевич өз атынан және партия атынан депутаттарды құттықтап, оларға табысты жұмыс тіледі.
– Барлық деңгейдегі депутаттар әлеуметтік маңызды мәселелерді біліп, шешу жолдарын қарастыру тиіс. Жұмыс сапарларының қорытындысы бойынша хаттамалар жасалады, ауылдағы өмірді жақсарту үшін тиісті ұсыныстар дайындаймыз. Барлық сұрақтар депутаттардың бақылауында болады, – деді Илья Теренченко.
Нұрлан ОРАЗҒАЛИЕВ