Архив деректері бойынша, Спасск зиратында 5000-нан астам 50-ден астам ұлт өкілі жерленген.
2004 жылы Қарағанды облысы әкімдігінің бастамасымен Қазақстан жерінде жатқан саяси қуғын-сүргін құрбандарының барлығына ескерткіш орнатылды.
Еске алу рәсіміне Қарағанды облысына Еуроодақтың бірқатар елшілігінің өкілдері келді. Сондай-ақ Қазақстан халқы Ассамблеясының мүшелері, этномәдени бірлестіктердің басшылары тоталитаризм жылдарында жазықсыз зардап шеккен отандастарын еске алды.
«Вайнах» қоғамдық бірлестігінің ақсақалдар кеңесінің төрағасы Сулим Исакиев бүкіл отбасын туған жерінен күштеп Қазақстанға жер аударғанда небәрі 4 жаста болған.
– Бұл туралы айтқанда денем түршігеді. Қыс мезгілі еді. Олар өзімізбен бірге ештеңе алуға рұқсат бермеді. Адамдарды жүк вагондарына тиеді. Көбісі жолды көтере алмады, жолда қайтыс болды. Қазақтарға аман қалуымызға, қиындықтарға төтеп беруге көмектескені үшін рақмет. Мен осында қалдым, балаларымды өсірдім, қазір менің жеті немерем бар. Жыл сайын біз бұл мемориалға ата-бабаларымызды құрметтеу үшін келеміз. Бұл қасірет әртүрлі ұлт өкілдеріне ортақ деп білемін, – дейді 84 жастағы Сулим Исакиев.
Сонымен қатар «Әнет баба» мешіті және Михайловка ықшам ауданындағы Саяси қуғын-сүргін және жаппай ашаршылық құрбандарына арналған ескерткіштерге гүл шоқтарын қою рәсімі өтті.
Аталған шараға ардагерлер, депутаттар, жастар, саяси партия өкілдері, еріктілер, қала тұрғындары қатысты.
Әдебиет БЕЛГІБАЙҰЛЫ,
Қарағанды облысы