Бұл туралы өңірлік коммуникациялар қызметінде өткен брифингте Қызылорда облысы әкімдігі Білім басқармасының басшысы Мейрамбек Шермағанбет мәлімдеді. Оның айтуынша, биыл облыста 15 546 оқушы 9-сыныпты тәмамдайды. Бұл тұрғыда 9-сыныпты бітірушілер үшін қорытынды аттестациялау 2-13 маусым, ал 11-сынып бітірушілер үшін 5-19 маусым аралығында өтеді.
«Жалпы, биылғы оқу жылының тың жаңалықтары аз емес. Атап өтсем, техникалық және кәсіптік білім беру ұйымдарында дипломдарды салтанатты түрде тапсыру рәсімі 28 маусым мен 1 шілде аралығында өткізіледі. Ал мектеп түлектеріне аттестат тапсыру шарасы 20-22 маусымда болады. Ең бастысы, педагогикалық этиканы сақтау және сыбайлас жемқорлық құқықбұзушылықтардың алдын алу мақсатында іс-шараларды өткізуге, аниматорларды, демалыс агенттіктерін, жеке студияларды тарту үшін ата-аналардан қаражат жинауға жол берілмейді. Сонымен қатар мектеп әкімшілігі мен мұғалімдерге сыйлық ретінде қаражат жинауға тыйым салынады. Бұл мақсатта облыстық Білім басқармасы арнайы бұйрық шығарып, қалалық және аудандық білім бөлімдері арқылы барлық білім беру ұйымдарына тыйым салу жөнінде ескертілді. Ата-аналар мен оқушыларға түсіндірме жұмыстары жүргізілді», – деді Мейрамбек Зинабдинұлы.
Негізінен, 2022-2023 оқу жылында Қызылорда облысынан 8 мыңнан аса түлек мектепті бітірсе, оның 7421-і Ұлттық бірыңғай тестілеуіне қатыспақшы.
«Жалпы, ҰБТ былтырдан бастап электронды форматқа өткені белгілі. Биыл айтарлықтай өзгеріс жоқ. Тек Қазақстан тарихы және Оқу сауаттылығы пәндері бойынша тест тапсырмаларының санына өзгерістер енгізілді. Қазақстан тарихы бойынша сұрақтар саны – 20. Ол өткен жылы 15 сұрақ болған. Ал оқу сауаттылығы бойынша сұрақтар саны былтыр 20 болса, биыл – 15 сұрақ. Сонымен қатар 2022-2023 оқу жылынан бастап ҰБТ бейіндік пәндер комбинацияларының тізбесіне Информатика пәні енгізілді. Осыған байланысты «Информатика мұғалімдерін даярлау», «Ақпараттық технологиялар», «Ақпараттық қауіпсіздік» білім беру бағдарламалары топтарына түсушілер ҰБТ-ны «Математика-Информатика» комбинациясы бойынша тапсырады», – деді басқарма басшысы.
Жаз айларында балалардың демалысын ұйымдастыру бағытында да ауқымды жұмыстар жүргізілмек. Бұл тұрғыда аймақта 10 лагерь жұмыс істесе, 7 лагерь мемлекеттік, ал қалған 3-еуі жазғы тынығу лагері. Онда 7 ауысымда 8 890 бала жазғы демалысын өткізетін болады. Сонымен қатар облыс бойынша мектептердің барлығында мектеп жанынан күндізгі тынығу лагерьлерінің жұмысы ұйымдастырылып отыр. Онда 98 мыңға жуық оқушыны қамту көзделген.
Басқарма басшысының айтуынша, жазғы тынығу лагерьлеріне бірінші кезекте ата-анасының қамқорлығынсыз қалған, көпбалалы және аз қамтылған отбасылардан шыққан балаларды жіберу қарастырылған. Сол сияқты жергілікті жердегі меценаттар мен кәсіпкерлердің демеушілігімен 1 326 бала облыстан тыс жердегі лагерьлерде демалады. Бұған қоса, Оқу-ағарту министрлігінің «Қазақстан халқына» қоғамдық қорымен бірлесіп жасаған 2023 жылғы жаз мезгілінде «Жаздық жолдама» әлеуметтік жобасы аясында облысқа 600 орынға квота бөлінген. Осы арқылы 320 оқушы Алматы қаласындағы «Спутник» балалар сауықтыру лагеріне, 280 оқушы басқармаға қарасты Жаңақорған ауданындағы облыстық олимпиадалар және қосымша білім беру орталығында демалатын болады. Сонымен қатар «Жасыл ел» әлеуметтік жобасы аясында 1 871 оқушы мен студенттер маусымдық жұмыспен қамтылмақшы.
Ербақыт ЖАЛҒАСБАЙ,
Қызылорда облысы
Елдар ҚАБА (коллаж)