Кейінгі жылдары тұрғындарының да саны көбейіп, қанатын кеңге жая түскен аудан орталығында қолынан іс келетін жанға жұмыс табылады және мемлекет тарапынан тиісті қолдаулар да жасалады. Соның нәтижесі болар, шағын және орта кәсіпкерлік өркен жайып отыр.
Сарыөзектік Айжан Артықбаева да кәсіпкерлікті таңдаған бір жылдан астам уақытта өмірден өзінің орнын тапқанын іс жүзінде дәлелдеді. Былтырғы қыркүйекте «Кәрібаева» жеке кәсіпорнын құрып, бірнеше жанды жұмысқа алып, ет, сүт, нан-тоқаш өнімдерін шығара бастаған. Жыл ішінде өзінің тұрақты тұтынушыларын қалыптастырды. Қазіргі кезде ауданды айтпағанда, Талдықорған мен Алматы қалаларынан да тапсырыстар қабылдап, табиғи тұрғыда таза, сапалы әрі дәмді азық-түлік өнімдерін күнделікті жөнелтіп жатады.
Танымалдық пен жетістік қарадан қарап келмесі анық. Дәл қазіргідей бәсекелі заманда бәйгеден келмесең, табыстың ауылы да алыстап кетеді. Осындай сынағы мол шақта ерінбей еңбек еткен, үнемі ізденісте болып, тұтынушылардың талабынан шыққандардың ғана айы оңынан туады. Айжан соны жақсы түйсініп, қай салада жүрсе де, тек алдан көрінуді мақсат тұтқан және уақыт көшінен қалмауды жадына мықтап түйген жан. Мектепті де «Алтын белгіге» бітірді. Жүрегі қалаған оқуға да қиналмай түсті. Алматыдағы Қазақ Ұлттық университетінің физика-математика факультетін ойдағыдай аяқтады. Кейіннен бухгалтер мамандығын да меңгеріп алды. Екі бірдей жоғары білімі бар. Сонымен бірге азды-көпті тәжірибе де жинақтап үлгерді.
– Менің түйгенім, адам өзінің сүйікті ісімен айналысқанда ғана жетістікке жетеді. Кез келген кәсіптің шыңына шығу оңайға соқпайды. Бизнестің жолы тіптен қиын. Тез табыс табуды мақсат тұтып, асығыстыққа жол берсең ұтыларың анық. Өзіңнің жаның қалаған өндірістің барысында пайда болатын жағымды көңіл күй мен ынталылық, айналаңдағы адамдармен тіл табысып, қажет жерінде оларды демеп жіберу кәсіпкерліктегі алдан шығар қиындықтарды қиналмай жеңуге көмектеседі. Алға жылжыған жылдармен бірге біліктілігің арта түседі. Өнім сапалы әрі тұтынушы көңілінен шығатындай болуы үшін, өндіріс үрдісіне жауапты мамандар өз ісінің шебері болуы керек. Кәсібіңді жақсы көрумен бірге шыдамдылық пен кәсіпқойлықтың алар орны үлкен, – дейді Айжан.
«Кәрібаева» кәсіпорны «Дастархан» тауарлық брендімен азық-түлік өнімдерін өндіреді. Тағамдарды дайындауға арналған шикізат «Нұрдәулет» шаруа қожалығынан жеткізіледі. Бұл шаруашылықта 100 бас мүйізді ірі қара, 500-600 бас ұсақ жандық және 300 тауық бағып-қағылады. Ұнды да алыстан арбаламайды.
Қазіргі кезде ауданда болып жатқан той-томалақтар мен астардағы дастарханға негізінен осы кәсіпорынның өнімдері қойылады. Тапсырыстан кенделік жоқ. Тағамдар сиыр, қой және құс етінен дайындалады. Кәсіпорынның мәнтілері, тұшпаралары мен котлеттері және тағы басқа тағамдары үлкен сұранысқа ие. Сүттен қаймақ, ірімшік, құрт дайындалады. Сонымен бірге түрлі бауырсақтар, тоқаштар мен тағы басқа да нан өнімдері пісіріледі.
Кәсіпорында 6 адам жұмыс істейді. Барлығы – жергілікті тұрғындар. Арнайы мамандықтары жоқ болғанына қарамастан, жылдар бойы жинақталған бай тәжірибе мен қалыптасқан ептіліктері арқасында өз істерінің шебері атанған жандар. Біліктілігі жоғары мамандардың ақылы курстарына қатасып, білгендерін жетілдіріп тұрады. Ет және ет өнімдері өндірісі бойынша жоғары білімі бар технологпен тұрақты байланыс орнатылған. Шығарылатын өнімдердің түрлерін арттырып, сапасын барынша жақсарту мақсатында «Бір ауыл – бір өнім» жобасына қатысуға өтінім тапсырыпты. Егер ол қолдау тапса, алдағы кезде тауарайналымын жақсартып, бәсекелестікке қабілетті барынша арттыру қадамдары қолға алынбақ. Сонымен бірге жастардың ауылда тұрақтап қалуына ықпал ету жолдары да қарастырылмақ.
Болат АБАҒАН,
Жетісу облысы