«Жайлы мектеп» ұлттық жобасы Мемлекет басшысы Қасым-Жомарт Тоқаевтың тапсырмасымен жүзеге асырылуда. Жоба аясында елімізде 740 мың орындық 369 заманауи мектеп ашу жоспарланған. Бұл өз кезегінде апатты жағдайдағы және үш ауысымды мектептер мәселелерін шешеді.
Ұлттық жобаны іске асыру үшін 2023-2025 жылдарға арналған республикалық бюджеттен 2,4 трлн теңге қарастырылған.
Мемлекет үшін «Жайлы мектептердің» құрылысы өте маңызды жоба, өйткені ол білім беру нысандарын жұмысқа енгізуге және өскелең ұрпақ үшін жаңа үрдістер мен ІТ технологияларды ескере отырып, заманауи мектептерде оқытуды қамтамасыз етуге мүмкіндік береді.
Жезқазған қаласында биыл пайдалануға беріледі деп жоспарланған 300 орындық бірінші жайлы мектептің құрылысы басталып кетті. Тағы да осындай 5 жайлы мектеп келесі жылы есігін айқара ашады деп жоспарланған. Атап өтсек, Жезқазған қаласының «Батыс» шағынауданында – 1 200, Сәтбаев қаласының 8 шағынауданында – 900, Жаңаарқа кентіндегі «Жаңа Нұр» шағынауданында – 600, Жаңаарқа ауданының Түгіскен ауылында – 300, Ұлытау ауданының Ұлытау ауылында 300 орындық мектеп құрылысы жоспарланып отыр.
Ұлытау облысы Білім басқармасының хабарлауынша, жалпы есеппен 6 мектептің құрылысына республикалық бюджеттен 25,6 миллиард теңге қарастырылған.
Барлық мектеп бойынша тиісті жер телімдері анықталған.
Ұлттық жоба шеңберінде жоспарланып отырған мектептер білім алушыларға жайлы, қауіпсіз болатындай бірыңғай стандартпен салынады. Сонымен қатар бұл мектептердің оқу-тәрбие үрдісіне қажетті жабдықтары, пәндік кабинеттері, техникалық құрылғылары мен жиһаздары да толығымен белгіленген қаражат арқылы жабдықталады.
«Жайлы мектеп» ұлттық жобасының шеңберінде ашылатын мектептерге директорларды бекітуге де ерекше талап қойылады. Директорлыққа үміткерлер «Білім берудегі өзгерістер көшбасшыларын іріктеу және даярлау тәртібіне» сәйкес таңдалады. Қазір тәртіпке сәйкес іріктеу туры жүргізілуде.
Ұлттық жобаны іске асырушы бірыңғай оператор болып Samruk-Kazyna Construction компаниясы белгіленген.
Бүгінде жайлы мектептердің құрылысы бойынша барлық құжаттама электронды форматқа көшірілді. Бұл мемлекетіміздің құрылыс саласын цифрландырудағы үлкен серпіліс екені анық.
– Жайлы мектептерді жобалау, салу және жабдықтау бойынша барлық құжаттама электронды форматта жүргізілетін болады. Бұл жүйеде сыбайлас жемқорлық қауіп-қатері жоқ. Құрылыс саласында біз «Жайлы мектеп» пилоттық ұлттық жобасы аясында елімізде бірінші болып Е-Qurylys жүйесіне көшіп жатырмыз. Құрылыс жұмыстарына аса жауапкершілікпен қараймыз. Мердігерлердің жұмысы да бақылауда. Компаниядан апта сайын техникалық есептер талап етіледі. Құрылыс жұмыстары барысында сапаға басымдық береміз, – дейді SamrukKazyna Construction басқарма төрағасы Мәулен Айманбетов.
Жезқазған қаласының «Жайлы мектеп» ұлттық жобасы аясында құрылысы басталған білім ордасы Жезқазған қаласына қарасты Қабанбай шағынауданында салынып жатыр. Жоспар бойынша жыл соңына дейін құрылыс аяқталуға тиіс.
200-ден астам отбасы тұратын елді мекенде бұрын-соңды мектеп болмаған. Мердігер – «Nur Astana Kurylys» компаниясы.
Мұндағы 300-ге жуық оқушы автобуспен Жезқазғанға қатынап оқып келген болатын.
– Оқушылардың орын жетіспеушілігі Жезқазған қаласында, Сәтбаев қаласында, яғни халық көп қоныстанған жерлерде бар. Қазір облыста жаңадан ашылатын мектептер болсын, қазіргі мектептер болсын педагогтермен қамтамасыз ету бойынша жұмыстар жүріп жатыр. 2022 жылда да, 2023 жылда да бізде 300-дей педагогтің қажеттілігі болған. Мұғалімдер тапшылығын жою мақсатында Білім басқармасы өзге облыстардағы университеттермен байланыс орнатты. Соның нәтижесінде былтыр өңірге 155 жас маман келді, – дейді Ұлытау облыстық Білім басқармасының басшысы Сапура Төлекова.
Бір жақсысы, жаңадан салынып жатқан білім ошағында жылу мәселесі болмайды, өйткені нысанға жеке модульді қазандық салынады.
Ғимарат 5 блоктан тұрады. Білім ошағында 25 орындық даярлық тобына орын қарастырылған. Айналасында спорт, футбол, work out, іс-шаралар өткізуге арналған алаңдар орналасады.
Әдебиет БЕЛГІБАЙҰЛЫ,
Ұлытау облысы