Мемлекеттік қызмет саласындағы бақылау басқармасы берген ақпаратқа сүйенсек, Жамбылда жыл басынан бері қыз-меттік көлікті қызметтен тыс уақытта пайдаланудың 22 дерегі тіркеліпті.
– Жамбыл облысы әкімдігінің Цифрлық технологиялар басқармасының қызметтік автокөлігі (мемлекеттік нөмері 594AS08) биылғы 4 сәуірде түнгі сағат 00:44-те, яғни жұмыстан тыс уақытта «Тараз–Қайнар» тасжолының 476,55 шақырымында жылдамдықты асырғаны үшін әкімшілік жауапкершілікке тартылғандығы анықталды. Салынған әкімшілік айыппұлдың мөлшері 36 920 теңгені құрайды. Сондай-ақ Байзақ ауданы Дихан ауылдық округі әкімі аппаратының қызметтік автокөлігі (мемлекеттік нөмері 956АН08) биылғы 30 наурызда сағат 15:56-да (демалыс күні) «Батыс Еуропа–Батыс Қытай» автодәлізінің 351 шақырымында жылдамдықты асырғаны үшін әкімшілік жауапкершілікке тартылды. Мұндағы салынған әкімшілік айыппұлдың мөлшері – 18 460 теңге. Одан бөлек, Меркі ауданы әкімі аппаратының қызметтік автокөлігі (мемлекеттік нөмірі 087JO08) биылғы 21 сәуір демалыс күні түнгі сағат 03:19-да «Алматы–Бішкек» тасжолының Қаскелең қаласына қарай бағытта жылдамдықты асырғаны үшін, Жамбыл ауданы әкімі аппаратының қызметтік автокөлігі (мемлекеттік нөмері 074JO08) биылғы 4 мамырда кешкі сағат 19:00-де (демалыс күні) Тараз қаласында жылдамдықты асырғаны үшін, Қордай ауданы әкімі аппаратының қызметтік автокөлігі (мемлекеттік нөмері 053JO08) биылғы 16 маусымда түнгі сағат 02:11-де (демалыс күні) Тараз қаласында жылдамдықты асырғаны үшін, Тараз қаласы әкімдігінің тұрғын үй қатынастары бөлімінің қызметтік автокөлігі (мемлекеттік нөмері 455AF08) биылғы 5 мамырда кешкі сағат 18:40-та (демалыс күні) Тараз қаласында жылдамдықты асырғаны үшін және Шу ауданы әкімдігінің ауыл шаруашылығы бөлімінің қызметтік автокөлігі (мемлекеттік нөмері 696AN08) биылғы 23 мамырда түнгі сағат 00:13-де (жұмыстан тыс уақытта) «Батыс Еуропа–Батыс Қытай» тасжолының Кенен ауылында жылдамдықты асырғаны үшін әкімшілік жауапкершілікке тартылып, әр көлік жүргізушісіне 18 460 теңге көлемінде әкімшілік айыппұл салынған, – дейді Мемлекеттік қызмет саласындағы бақылау басқармасының бас маманы Еламан Інжат.
Ал Мойынқұм ауданы әкімі аппаратының қызметтік автокөлігіне (мемлекеттік нөмері 118JO08) биылғы 25 наурыз күні таңғы сағат 06:19-да «Меркі–Шу–Бурылбайтал» тасжолының 191 шақырымында жылдамдықты асырғаны үшін 36 920 теңге көлемінде айыппұл жазылған. Дәл сондай Жуалы ауданы әкімдігінің жұмыспен қамту және әлеуметтік бағдарламалар бөлімінің қызметтік автокөлігіне (мемлекеттік нөмері 113AP08) 11 наурыз күні таңғы сағат 05:05-те «Шымкент–Тараз» тасжолының 534,62 шақырымында жол ережесін бұзғаны үшін 36 920 теңге көлемінде айыппұл салынған.
Жалпы, қызметтік автокөліктерді қызметтік емес мақсаттарда пайдалану бойынша Жамбыл ауданында – 4 дерек, Меркі ауданында – 3, облыс әкімдігінің Білім басқармасына қарасты бөлімдерінде – 3, Байзақ ауданында – 2 және Мойынқұм ауданында – 1 дерек тіркеліп, айыппұл жазылып отыр.
Айта кетейік, бұл жайттар жол бойындағы бейнекамералар арқылы анықталған. Сондықтан сол күні көлікте мекеме басшысы болды ма, жоқ па оны тап басып айту қиын. Себебі бейнекамера арқылы көлікте қанша адам болғанын анықтау мүмкін емес. Алайда басшысыз шопыр қызметтік көлікті демалыс немесе қызметтен тыс уақытта пайдаланды дегенге сене алмайсың. Сондықтан Мемлекеттік қызмет істері агенттігінің Жамбыл облысындағы Әдеп жөніндегі кеңестің төрағасы Руслан Шарипов бұл деректер бойынша жіті тексеріс болатындығын айтады.
– Бұл – мемлекеттік қызметтің нормасына сай келмейтін жағдай. Қызметтік көлік тек қызмет барысында пайдалануы керек. Сол себепті біз қызметтік көліктерді демалыс немесе жұмыстан тыс уақытта пайдаланған адамдарды анықтап, шара қабылдайтын боламыз. Ол үшін нақты тексерістер жүргізіледі, – дейді Әдеп жөніндегі кеңестің төрағасы.
Бір қырынан қарасаң түн мезгілінде басшысының рұқсатынсыз шопырдың қызметтік көлікпен қыдырып жүр деу еріксіз езу тартқызады. Сондықтан мұнда ақиқат су бетінде қалқып тұрғандай.
Айтпақшы күні кеше Талас ауданы Қаратау қаласында тазалыққа жауапты мекеме басшылары мемлекетке тиесілі төрт көлікті сатып жіберген жағдай тіркелген болатын. «Таза–Талас» кәсіпорнының директоры мен орынбасары алдымен автокөліктерді жарамсыз мүлік ретінде есептен шығарып, кейіннен қолма-қол ақшаға сатып жіберген. Нәтижесінде, мемлекетке 22 миллион теңге залал келген. Ал мемлекет мүлкін талан-таражға салған жауаптылар 7 жыл мерзімге бас бостандығынан айырылды. Сондай-ақ әрқайсына мемлекеттік қызметте лауазымдық қызмет атқаруға өмір бойына тыйым салынды. Міне, осылайша мемлекет мүлкін «майшелпекке» айналдырғысы келгендер абақтыдан бір-ақ шығып отыр. Сондықтан қызметтік көлік мәселесі атүсті қарайтын нәрсе емес. Жоғарыда айтылған деректер бойынша да жауаптылар тиісті жазасын алады деп сенеміз. Әйтеуір «айран ішкен құтылып, шелек жалаған тұтылып» жүрмесе болғаны.
Бұл тұста тағы бір айта кетерлігі, қызметтік көлікпен жол ережесін бұзғандарға барлығы 221 520 теңге көлемінде айыппұл салынған. Ал белгіленген заңдылық бойынша айыппұл қағазы қызметтік көлік тіркелген мекемеге жолданып, соның есепшотынан төленеді. Сонда бұл да мемлекет қаржысын талан-таражға салу емес пе?
Саятхан САТЫЛҒАН,
Жамбыл облысы