Аталған іс-шарада 6 мемлекеттің өнерлі жастары бақ сынады. «Жастар Рухы» жастар қанатының төрағасы Ақерке Ескендірованың айтуынша, чемпионат осымен екінші рет ұйымдастырылып отыр.
«Біздің басты мақсатымыз – жастар арасында салауатты өмір салтын насихаттау, субмәдениет өкілдеріне қолдау көрсету және жастардың бос уақытын тиімді пайдалануына жағдай жасау. Екі күнге созылған чемпионат барысында еліміздің түкпір-түкпірінен, сондай-ақ көршілес мемлекеттерден арнайы ат басын бұрған ең танымал ұжымдар мен бишілер, сондай-ақ жас таланттар бақ сынады», – деді ол.
Чемпионатта Жапонияның WAACKING бишісі, ASIAN WAACKING SENSETION жетекшісі, World of Dance World Final финалисі, Сrowd FAVORITE сыйлығының иегері Mizuki Jane Flamingo, Бельгияның хип-хоп бишісі, 2022 жылғы жазғы фестивальдің және жаһандық көптеген би жарысының жеңімпазы Alex the Cage, сонымен қатар кореялық Popping бишісі, LINEUP 9 JUDGE финалисі Firebac арнайы төрелік етіп, әділ бағасын берді. Сондай-ақ олар қатысушылар алдында өз шеберліктерін көрсетіп, тәжірибелерімен бөлісті.
Өз кезегінде, жапон бишісі, чемпионат төрешісі Mizuki Jane Flamingo дүбірлі дода аса тартысты өткенін жеткізді.
«Қазақстанға тұңғыш рет келіп отырмын. Ұйымдастырушылар өте жылы қарсы алды. Екі күн бойы түрлі номинация бойынша сынға түскен талантты бишілердің тартысты бәсекесіне куә болдық. Шынымды айтсам, дарынды жастар арасынан жеңімпаздарды анықтау қиынға соқты. Чемпионатты ұйымдастырушылар мен қатысушыларға алғыс айтамын. Барша жеңімпазды шын жүректен құттықтаймын», – деді ол.
Осылайша, 300-ден астам өнерпаз бас қосқан чемпионатта 7 номинация бойынша үздік өнерпаздар айқындалды. Атап айтсақ, Hip-Hop 2x2 Begginers, Hip-Hop 1х1 Male, Hip-Hop 1x1 Female, Popping 2x2 Pro, Waacking 2x2 Beginners, Waacking 2x2 Pro, All Styles 5x5 Rep Your Country. Соңғы номинация бойынша Жапония, Өзбекстан, Қазақстан елдерінің бишілері өзара бақ сынады. Сондай-ақ Қазақстан, Өзбекстан, Қытай, Жапония мемлекеттерінің бишілері өзге де номинациялар бойынша сынға түсті.
Чемпионат қорытындысы бойынша:
•Hip-Hop 2x2 Begginers – Амалия и Эстель
•Hip-Hop 1х1 Male – Overhitz
•Hip-Hop 1х1 Female – Nursaya
•Popping 2x2 Pro – Sss&VV
•Waacking 2x2 Pro – Yumetaurus;
•Waacking 2x2 Beginners – Кчау Аруана & Нурсауле
•All Styles 5x5 Rep Your Country – Өзбекстан командасы жеңіске жетті.
Жеңімпаздарды «Жастар Рухы» жастар қанатының төрағасы Ақерке Ескендірова, Астана қаласының Жастар саясаты мәселелері басқармасының басшысы Самат Ибраев, Астана қаласы мәслихатының депутаты, Астана қаласы футбол федерациясының президенті Давид Лория, «Жастар Рухы» жастар қанаты Астана қалалық филиалының төрағасы, Астана қаласы мәслихатының депутаты Арсланбек Мағзұм марапаттады. Чемпионат жеңімпаздары мен финалистеріне арнайы сыйлықтар мен дипломдар табысталды.
Бұл ретте Өзбекстан командасының мүшесі Владимир Мешчеряков былтыр дәл осы чемпионатқа қатысып, финалист атанғанын еске алды.
«Биыл All Styles 5x5 Rep Your Country номинациясына қатысу үшін командамен келдім. Ел намысын қорғап, жеңімпаз атанғанымызға қуаныштымыз. Жапония мен Қазақстан бишілерімен сынға түсіп, жеңіске жету оңай болмады. Барлығы мықты қарсыластар. Чемпионатты жоғары деңгейде өткізген ұйымдастырушылар қауымына алғыс білдіреміз», – деді ол.
Айта кетеміз, чемпионат былтыр «Есірткіге жол жоқ» жобасы аясында өтсе, биыл V Дүниежүзілік көшпенділер ойындары аясында ұйымдастырылды.