Қарапайым пошташы туралы жергілікті сайттардың бірінде жарияланған материал осылайша Жұмажан Бегалиевке бір күннің ішінде танымалдық әкелді.
Жұмажан Бегалиев – ерекше кейіпкер. Қазір зейнет жасында. Құрметті еңбек демалысына шыққанға дейін ол төтенше жағдайлар департаментінде, полиция саласында қызмет еткен. Соңғы үш жылдан бері пошташы болып қызметке тұрған Жұмажан аға күніне кемінде 10 мың шақырымды жаяу жүріп өтетінін айтады.
Өзінің ерекше жұмысы туралы үлкен махаббатпен айтатын Жұмажан Бегалиевке ол туралы сайтта мақала шыққаннан кейін, жергілікті гүл сататын дүкендер желісінің бірі велосипед сыйға тартты. Келесі күні ұялы телефон сататын дүкендер желісі жаңа телефон сыйлады. «Менің сұхбатыма біреу назар аударады деп ойламаппын. Мен үшін бұл күтпеген жағдай болды. Тіпті, өзімді шексіз бақытты сезініп кеттім. Әлемде осындай қайырымды адамдар көп екенін сезіну – керемет әсер. Хат тасуым енді бұрынғыдан да жеңілдей түсетін болды», – дейді Жұмажан ағаның өзі.
Зейнет жасына шыққаннан кейін үйде отыра алмай, қоғаммен араласып, еңбек етуді жөн саған Жұмажан аға көп ойланбай пошташы болып жұмысқа тұрған. Атырау қаласындағы «Қазпоштаның» №9 бөлімшесінде жұмыс істейтін Жұмажан Бегалиевтің жұмыс уақыты күн сайын таңғы 8-де басталады. Және бір ерекшелігі, пошташылар үшін «қолайсыз ауа райы» деген ұғым жоқ.
Ауа райының аптап ыстығына, суығына, жауыны мен қарына қарамастан, пошташылар күн сайын жеткізумен айналысады. Технология төңкерісі, заман дамыды, адам біткеннің бәрі әлеуметтік желіге байланды дегенімізбен, әлі күнге дейін хат жазатындар, сәлемдеме жіберіп, газет-журнал алатын адамдар бар. «Бізді күтетін кісілер өте көп. Сондықтан мейлінше кешікпеуге тырысып, әр аманатты уақытымен жеткізуге ұмтыламыз», – дейді пошташы Жұмажан ағаның өзі.
«Қазпошта» Атырау облыстық филиалының №9 бөлімшесі аумағына қарайтын «Француз қалашығы», «Ақ шағала», «Авангард» территориялары бойынша хат-хабар таситын пошташы Жұмажан Бегалиев бастапқыда мекенжай табудан қиналғанын айтады.
«Сол үшін телефоныма 2GIS картасын жүктеп, үйреніп алдым. Барлық мекенжайды жаяу аралайтынмын. Енді керемет тұлпарым – велосипедім бар. Тұлпарыма мініп алып, мені күтіп отырған тұрғындарға хат жеткізуге асығамын. Маған осы жұмысым өте қатты ұнайды. Жай тасушы, жеткізуші ғана емес, көп адаммен сөйлесемін. Әсіресе, зейнет жасында отырған үлкен кісілердің әңгімесін тыңдаған ұнайды. Жасы үлкен әжелердің арасында үй шаруасына көмек сұрайтындары да бар. Қолымнан келсе, қолғабыс етемін», – дейді Атыраудың жұлдызына айналған пошташы Жұмажан Бегалиев.
Кейіпкеріміздің айтуынша, былайғы күндері хат таситын сөмкесі ауыр бола бермейді. Ал газет шығатын күндері сөмкесінің салмағы кәдімгідей ауырлайды екен. «Көбіне іскерлік бағыттағы хаттарды тасимын. Бірақ шетелдерден келетін хаттар да көп. Өйткені түрлі себептермен шетелдерде жұмыс істеп жатқан немесе әскер қатарында борышын өтеп жүрген балаларынан ата-аналар кәдімгідей хат күтеді. Осындай алыстан келген сағынышқа толы хаттарды үлкендерге жедел жеткіуге тырысамын. Әр хат-хабардың артында аманат тұрады», – дейді пошташы.
Сырт көзге қарапайым қызмет болып көрінгенімен, шын мәнінде пошташылар – елене бермейтін батырлар. Өйткені пошташылар – жай хат-хабар тасушы ғана емес, адами қарым-қатынастарға жылы леп беруші тұлғалар.
Баян ЖАНҰЗАҚ,
Атырау облысы