Серік Ақсұңқарұлы – Ақтоғай ауданы Қызыларай ауылының тумасы. Алғашқы өлеңдерін мектеп жасында жазған. Қарағанды мемлекеттік университетін бітіргеннен кейін бірнеше газетте еңбек етті. Қазақстан Жазушылар одағының, Абай халықаралық клубының мүшесі. 15 кітаптың авторы, үш томнан құралған таңдаулы шығармалар жинағы жарық көрген. Серік Ақсұңқарұлы аудармашы ретінде де танымал: қазақтілді оқырмандар үшін ол Александр Пушкин, Анна Ахматова, Марина Цветаева, Евгений Евтушенко, Назым Хикмет және тағы басқа ақындардың өлеңдерін аударған. Өз кезегінде оның өлеңдері орыс, украин, түрік, қырғыз, әзербайжан, моңғол және испан тілдеріне аударылған.
Кеш шымылдығы Мемлекет басшысы Қасым-Жомарт Тоқаевтың құттықтау хатымен ашылды. Оны мерейтой иесіне Президенттің ішкі саясат мәселелері және коммуникациялар жөніндегі көмекшісі Арман Қырықбаев табыстады. Сенат Төрағасы Мәулен Әшімбаевтың, Премьер-Министр Олжас Бектеновтің құттықтау хаттарын Премьер-Министрдің кеңесшісі Ералы Тоғжанов жеткізді. Сонымен қатар Парламент Мәжілісінің депутаты Аманжол Әлтай Мәжіліс Төрағасы Ерлан Қошановтың атынан құттықтап, сый-сияпат жасады.
Сондай-ақ Серік Ақсұңқарұлына Мемлекеттік кеңесші Ерлан Қариннің, Мәдениет және ақпарат министрі Аида Балаеваның, Астана қаласының әкімі Жеңіс Қасымбектің құттықтау хаттары табысталды.
Қазақстан Жазушылар одағы төрағасының игі тілегін жеткізген «Қазақ әдебиеті» газетінің Бас редакторы Бауыржан Жақып Серік Ақсұңқарұлы «Қазақстанның құрметті жазушысы» атанғанын сүйіншіледі.
Е.Бөкетов атындағы Қарағанды зерттеу университетінің ректоры Нұрлан Дулатбеков оқу ордасының Ғылыми кеңесінің шешімімен Серік ақынды университеттің «Құрметті профессоры» атағымен марапаттады.
– Сіз – көрнекті ақынсыз, құрметті азаматсыз. Дарыныңызбен қазақ әдебиетіне зор үлес қосып келесіз. Сіздің шығармаларыңыз жастайыңыздан жоғары бағаланып, оқырмандардың ыстық ықыласына бөленді. Сіз көп жылдар бойы Қазақстан Жазушылар одағының Қарағанды облыстық филиалын басқардыңыз. Сарыарқаның дарынды ақындарын бір арнаға біріктіру жас жазушыларға үлгі болды, – деді Ермағанбет Бөлекпаев.
Кеште ақынның өлеңіне жазылған әндерді жұртшылыққа танымал әншілер асқақтата орындап, көрермен ықыласына бөленді. Әсіресе, атағы жер жарған Ақтоғай ауданының «Тоқырауын толқындары» ән-би ансамблі орындаған Серік Ақсұңқарұлының өлеңіне жазылған «Шайтанкөл аққулар мекені» әні кештің шырайына шырай қосып, жәми жамағаттың көңіл қошына айналғаны анық еді. Дүркірете қол соғып, қошемет көрсеткен көрермен өзге де өнерпаздардың әсерлі әндерін ықыласпен қабылдады.
Әдебиет БЕЛГІБАЙҰЛЫ,
Қарағанды облысы