«Ақ жол» партиясы атынан сайлауға түсетін үміткер Дания Еспаева Қостанай облысының Алтынсарин ауданында сайлаушылармен кездесті. Аталған үгіт-насихат шарасына Республикалық қоғамдық штаб мүшесі, Мәжіліс депутаты Ерлан Барлыбаев, сонымен бірге кандидаттың сенімді өкілдері мен «Ақ жол» партиясының өңірлік активі қатысты.
Дания Еспаева аудан халқын өзінің сайлауалды бағдарламасымен таныстырды. Кандидат сол өңірдегі бірнеше кәсіпорынға барды: «Темте» шаруашылығы, машина-трактор шеберханасы, «Олжа Белявка» серіктестігінің жұмысшыларымен, ауыл жұртымен кездесіп, сайлауалды бағдарламасындағы шағын және орта бизнесті қолдау шараларымен таныстырды. Күннің екінші жартысында «СарыаркаАвтоПром» ЖШС мен еліміздегі ESSIL астық жинау комбайндарын шығаратын бірден-бір «Агромашхолдинга» компаниясының еңбек ұжымдарымен жүздесті.
Компанияның елімізде 8 филиалы мен 11 өкілдігі жұмыс істейді. Еспаева бағдарламасында экономиканың әлеуетті салаларында – ауылдағы шаруашылықтар, қайта өңдеу, жеңіл және азық-түлік өнеркәсібі мен машина жасау саласында қосымша құн салығын азайту туралы ұсыныс жасағанын жеткізді. Үміткер, сондай-ақ ауылдағы мектеп ұжымымен де кездесті. Одан бір күн бұрын «Ақ жол» партиясының Атырау облыстық филиалы – ҚР президенттігіне үміткер Дания Еспаеваның аймақтық штабы «Рауан Налко» ЖШС еңбек ұжымымен кездесті.
«РауанНалко» ЖШС – мұнай-газ өндірісіне арналған химиялық реагенттерді өндіруші, әлемнің 160 елін қамтитын халықаралық «Налко Чемпион» компаниясымен бірлескен отандық кәсіпорын. Кездесуді «Рауан Налко» ЖШС директоры Б.Әжіғалиев ашты. Бұдан кейін партияның облыстық филиалы жетекшісі Е.Юсупов партияның бағыт-бағдарымен, сайлауалды мақсаттарымен бөлісті. Кездесуде, сондай-ақ облыстық филиалдың саяси жетекшісі Ә.Төлеуішов, облыстық саяси кеңестің мүшесі С.Ерубаев сөз сөйледі. Кәсіпорын жұмысшылары өздерін қызықтырған сұрақтарын қойып, жауап алды.
Айдана БЕГІМ