«Ауыл» партиясынан президенттікке үміткер Төлеутай Рақымбеков Шығыс Қазақстан облысын аралап жүр. Кандидаттың айтуынша, бұл сапардың мақсаты – өңірдің ауылшаруашылық саласындағы мәселелерімен жақын танысып, тұрғындарының сауалдарына жауап беру.
Сайлауалды топ ШҚО-дағы сүт-тауарлы фермаға барды. Фермада 3 000 бас мал бар, оның шамамен жартысы – сауын сиыр.
«Жылына орта есеппен алғанда бір сиырдан сауылған сүт 8 мың литрден асады. Бұл – Қазақстандағы орташа көрсеткіштен 3 есе көп. Егер ел көлемінде мұны 3 есеге арттырса, бүгінгі күні 6 млн тоннаға қосымша 12 млн тонна өнім шығарып, дайын өнімді экспортқа жіберер едік», – деп жазды Төлеутай Рақымбеков әлеуметтік желідегі парақшасында.
Шығысқазақстандықтардың мұндай жетістігінің сырын Төлеутай Сатайұлы былай түсіндірді: «Біріншіден, өндірісті дұрыс ұйымдастыру мен дұрыс менеджмент. Екіншіден, қазіргі заманғы технологияларға инвестиция салу, үшіншіден, өндірістің, ғылым мен білімнің тығыз интеграциясы. Фермадағы орташа жалақы осы саладағы орташа көрсеткіштен 3 есе көп».
Төлеутай Рахымбеков Шығыс Қазақстан облысындағы шаруа қожалықтардың біріне ат басын тіреді. Ол аталған қожалық жанындағы ғылыми-зерттеу орталығының қызметін өзгелерге үлгі етіп ұсынды.
«Отандық жас ғалымдар Украинадан шақырылған ғылым докторлары мен ғылым кандидаттарының басшылығымен дәнді және майлы дақылдардың, оның ішінде соя сортының селекциясымен айналысады. Жергілікті ШҚМУ түлектері шаруашылықта жұмыс істеп жатыр. Олардың жанында студент-практиканттар тәжірибеден өтіп жүр. Шаруа қожалығы 2018 жылдың өзінде ғылымға 385 млн теңге салыпты, ал бюджеттің үлесі – 15 млн теңге.
Міне, ғылымның, білімнің және агроөндірістің тығыз интеграциясының жарқын мысалы. Және ғылыми зерттеулерге жеке инвестиция салудың пайдалы екенінің нақты мысалы. Әрбір ауылда осылай болуы керек. Сол кезде ауыл тұрғындарының болашаққа деген құлшынысы артады.
Мен Қазақстан президенттігіне үміткер тұлға ретінде оған қалай қол жеткізуге болатынын анық білемін», – дейді ол.
Айдана БЕГІМ