Алматы қаласында 200-ден астам нысан «Nur Otan» партиясының бақылауында. Бақылау күнделікті назардан тыс қалмайды. Партияның Алатау аудандық филиалы мониторингтік тобы мектепке дейінгі мекемелерге кезекті рейд жасап, жағдаймен танысты. Бұл жолы №148, №153 және №120 бөбекжай-балабақшалар мониторингтік топтың назарына ілікті.
Мониторингтік топ алдымен №148 балабақшаға бет бұрды. Бұл жерде ойын алаңдарына жөндеу жұмыстары жүргізіліп жатыр екен. Бүлдіршіндердің таза да қауіпсіз ойын алаңында алаңсыз ойнауы үшін барынша жағдай жасауға әрекет етілуде.
– №148 балабақшаның ойын алаңдарына жөндеу жұмыстары жүргізіліп жатыр. Жұмыс 25 мамырда басталған. Тамыз айының 25-іне дейін барлық жұмысты аяқтап, тапсыруымыз қажет. Жұмыс кесте бойынша жүргізілуде. Қазір осы аймақта төрт нысанда осындай абаттандыру жұмыстары жалғасып жатыр. Бұл нысанда 75 адам жұмыс істеуде. Оның 37-сі Жұмыспен қамту орталығының қызметкерлері, қалғаны компания жұмысшылары. Алдымен бұрынғы алаңдарды бұзып, абаттандыру жұмыстарына дайындап, сосын ғана жаңартуға кірістік. Алаңшалардың бәріне резеңке жабындылар саламыз, – деді «ДМ строй» компаниясының нысандар бойынша жауапты маманы Қаныш Қоңырбаев.
Құрылыс нысанына негізінен жергілікті жұмысшылар тартылған. Мердігер компания өкілінің айтуынша, төрт нысан бойынша бөлінген қаражат сомасы 52 миллион теңге. Тек №148 балабақшаның өзінде 12 миллион 500 мың теңге игерілуде.
– Бұл жолы біз балабақшаларда жүргізіліп жатқан ішінара жөндеу жұмыстарымен таныстық. Балалар ойнайтын алаңдар тозып кеткен болатын. Мердігер компания жұмыс жүргізіп жатыр. Ең бастысы – жұмыстың сапасы. Сондықтан оның қалай істеліп жатқанын үнемі бақылап отырамыз. Құрылыстың жөндеу жұмыстарының мерзімінде аяқталуын, құрылыспен айналысып жатқан жұмысшылар жалақысының дер кезінде берілуін қадағалаймыз. Әзірге жұмыстың қарқыны жақсы. Құрылыс жұмыстарын жүргізудегі кейбір кемшіліктер, сын-ескертпелер айтылды. Баспалдақтар мүжілгенін, асфальттар жарылғанын байқадық. Алдағы уақытта тиісті орындарға айтып, қадағалауын тапсырамыз, – деді Алматы қаласы мәслихатының депутаты Қали Сәрсенбай.
Келісімшарт бойынша құрылыс материалдары Алматы қаласынан алынуы тиіс. Егер Алматы қаласында болмаған жағдайда Алматы облысынан жеткізіледі.
– Қазір біз күнделікті бақылау жұмыстарын жүргізіп отырмыз. Тек бүгін бес нысанның жұмысымен танысуға рейдке шықтық. Нысандарды аралағанда жұмысшылармен тілдесіп, олардың жергілікті адамдар екеніне көз жеткіземіз. Отандық құрылыс материалдарын пайдаланып жатқанын бақылаймыз. Нысандарға кейбір ескертпелерді айттық. Алдағы уақытта тағы да бақылауда ұстаймыз. Біз нысандарды аралау барысында кейбір құрылыс материалдарының отандық өнім емес екенін байқадық. Оны мердігер компания өкілі де жоққа шығарған жоқ. Бұл мәселенің ақ-қарасын анықтап, тиісті шаралар қолданамыз, – деді Алматы қаласы мәслихатының депутаты, «Nur Otan» партиясының Алатау аудандық филиалы бойынша партиялық бақылау комиссиясының төрайымы Нурия Ниязова.
Нысандарды аралау барысында еңбекшарты бойынша барлық санитарлық нормалар сақталғанын байқадық. Карантин режиміне сәйкес бәрі де бетпердемен жүр. Дезинфекциялық құралдар да жеткілікті.
Гүлнар ЖҰМАБАЙҚЫЗЫ