Облыс орталығындағы «Арай-2» алқабы – жеке тұрғын үй құрылысын жүргізетін тұрғындар үшін инфроқұрылымы тартылған жаңа алқап. Дегенмен бұл жерде мәселе де жоқ емес. Оның үстіне, тұрғындардың «электр сымдары дұрыс орнатылмағандықтан, жанымызды шүберекке түйіп отырмыз» деген жанайқайы жиындарда жиі айтылып келеді.
Алқаптағы Шота Руставели көшесінің тұрғыны, зейнеткер Бейбіт Байсариевтің мұнда көшіп келгеніне үш жылдан асыпты. Алайда тұрғын отбасы мүшелері үшін, оның ішінде ойын балаларына алаңдайтынын жеткізді.
– Көшенің бойында орналастырылған электр бағандары, біріншіден, стандартқа сай емес, екіншіден, тоқ жүретін кабельдер жер-жерде ілініп тұр. Көрші тұрған көшелерден тартылып алынған электр сымдары үшін тұрғындар арасында жиі дау-дамай туындайды. Электр энергиясын пайдалануда өрескел заңбұзушылыққа да жол береді. Биліктегілер мұны білмейді емес, біледі. Өйткені біз ай сайын «Жамбыл жарық сауда-2030» ЖШС-ға төлем жасаймыз. Бірнеше ай бұрын көшенің басындағы бағанды көлік қағып, көше жарықсыз қалды. Оның үстіне, үзілген сымдар әр жерде шашылып жатты. Беті аулақ, бірақ бір күн болмаса, бір күні мамандардың салғырттығынан сол сымдарға балалар түсіп кетсе, оған кім жауап береді? Біз техника мен технологияның дамыған уақытында өмір сүріп жатырмыз дейміз. Бірақ сол заманауи әдістер біздің алқапқа жетпей қалған ба дейсің, – дейді зейнеткер.
Расында, ешбір қауіпсіздік ережелері сақталмағанын аталған көшеге барған жан бірден байқайды. Толық көз жеткізу үшін Шота Руставели көшесіндегі бірқатар үйді аралап көрсеңіз де болады. Бір үйдің кабелі бір үйдің сыртқы дарбазасына дейін салбырап тұр. Енді бірінікі тіпті жерде жатыр. Ал ол кабельдердің барлығы жоғары вольтті электр сымдары екенін ескерсек, оқыс жағдайды елестетудің өзі қорқынышты. Тұрғындар табиғат тосын мінез көрсетсе, жарықсыз қаламыз ба деп алаңдаулы. «Руставели, Атабаев, Баянов көшелерінде түнгі жарық болмағандықтан, №8, 9 мөлтекауданы мен №3 лицейден қатынайтын оқушылар тас қараңғыда жүруге мәжбүр. Ал қыс айларында бұл көшелер мүлдем қорқынышты. 2017 жылы мамандар келіп, тұрғындарға осы көшелерге электр бағандарын орнату бойынша арнайы сметалық құжат дайындаймыз деген еді. Одан бері 2 жыл өтті. Не маман жоқ, не баған жоқ», – дейді Ш.Руставели көшесіндегі №104 үйдің тұрғыны.
Сондай-ақ алқап тұрғындары бұл мәселені Энергетика басқармасы басшысының қоғамдық қабылдауында бірнеше рет көтергендерін айтады. Бірақ ешбір жауап жоқ, «жабулы қазан жабулы күйінде». Бұл орайда көшедегі тұрғындардан ай сайын тұтынылған электр энергиясына ақша алып отырған «Жамбыл жарық сауда-2030» ЖШС мен Энергетика басқармасы қайда қарап отыр? Бетін аулақ қылсын, алайда апатты жағдай орын алса, оны қай мекеме өз мойнына алады? Әлде электр желілерін талапқа сай орнату үшін ел назары ауатын оқыс оқиға болу керек пе? Бұл сауалдардың жауабын сала мамандары жедел беріп, ертерек қамданғаны абзал.
Жамбыл облысы