Елбасы – Қазақстанның Тұңғыш Президенті Нұрсұлтан Назарбаевтың төрағалығымен өткен Nur Otan партиясы Саяси кеңесінің кеңейтілген отырысында партия жұмысын жаңғырту, қайта жандандыру мәселесіне баса мән берілді. Еліміздің көшбасшы партиясының алдында қандай міндеттер тұр деген сауал төңірегінде Мәжіліс депутаты Нұржан Әлтаевты әңгімеге тарттық.
– Нұржан Бауыржанұлы, Nur Оtan-ның Саяси кеңес отырысы, партияның, қоғамның алдына үлкен міндеттер жүктеді. Келелі басқосуда айтылған пікірлерге қатысты ойыңызды білсек деп едік.
– Саяси кеңес отырысында өте қажетті мәселелер қозғалып, партия көшбасшысы нақты қазіргі жағдайға байланысты қажетті тақырыптарды айтты, тапсырмалар берді. Біріншіден, біздің елімізде Nur Оtan партиясына жүктелген міндет үлкен. Президент сайлауында халықтың жоғары деңгейде дауыс беруінің өзі – партия жұмысына халықтың сенгенін байқатады. Ол сенімнің жауапкершілігі, салмағы билік партиясы үшін қашанда жоғары. Nur Оtan сол сенімді ақтау керек.
Екіншіден, партия тез арада, жедел түрде халықпен кері байланыс мәселесіне күш салуы қажет. Әлеуметпен байланыстың бұрынғы әдістері қазір ескірді. Қоғам жаңарды, адамдар өзгерді. Жаңарған қоғаммен бірге тұрғындардың да көзқарасы, дүниетанымы жаңарды, жетілді. Сондықтан байланыстың, қарым-қатынастың құралы, тетігі де жаңарғаны жөн. Қазір цифрлы заман, интернет дәуірі. Азаматтардың көпшілігі ақпаратты ғаламтор арқылы қабылдап, бір-бірімен жылдам әрі тығыз қатынас ортауға үйренген. Өзі сайлаған биліктен де, партиядан да сондай жедел қызмет көрсетуді, жылдам жауап алғанды қалайды, тіпті талап етеді. Сол себепті, партияның ендігі қызметі мен жұмысы барысында әлеуметтік желіні, интернетті пайдаланып туындаған проблеманы дер кезінде шешуге ұмтылуы керек. Партия тізімі арқылы сайланған депутттар да, партия басшылығы да кабинеттен шығып, елдің ішіне, өңірлерге барғаны дұрыс. Жақында біз Nur Оtan-ның Парламенттегі фракциясы жиналып, осы тақырыпта ақылдасып, жоспарын да жасап қойдық. Алдағы уақытта біздің тобымыз нақты мәселелермен тікелей айналыспақшы.
– Қиындықтан, жауапкершіліктен қашпау керек екенін айтып отырсыз. Бұл тұрғыда партияның әрбір жеке мүшесіне, кез келген нұротандық кадрға жүктелер міндет үлкен екені рас. Мұндай жауапты істен жалтарған әріптестеріңізге, жауапты тұлғаларға да талап күшейетіні айтылып жатыр ғой...
– Әрине, қатаң талапсыз, тәртіпсіз жұмыс жүрмесі анық. Тіпті, кейінгі кезде партия қызметкерлері, кадрлар тарапынан босаңсу, мәселеге немқұрайлы көзқарас таныту орын алғанын мойындау керек. Оның барлығы жоғарыдағы талаптың әлсіреуінен деп білемін. Кадр таңдауда, партияға қабылдар кезде партияның өз ішінде дауыс беру арқылы іс жүргізілгені жөн. Елдегі үлкен партия Nur Оtan-ға қабылданған азамат барлығына лайық болуы қажет. Бұрынғыдай «біреудің көзі жақсы, біреудің сөзі жақсы» деген әңгіме енді жүрмейді. Жұмыстан шаршаған, кабинеттен, жылы орыннан тұрғысы келмейтін бойкүйез кадрлар орын босататын кез келді.
– Саяси кеңес отырысында партияның атқарушы органдарға, жергілікті билік өкілдеріне ықпал ету тетігін іске қосу туралы айтылды. Өзіңіз Парламентке келгенге дейін еліміздің ауыл шаруашылығы, кәсіпкерлік және басқа да көптеген әлеуметтік салаларда қызмет еттіңіз. Партияның жекелеген салаларға араласуы қалай жүргені дұрыс деп білесіз?
– Шынын айтқанда, бұл – өте жауапты қадам. Неге десеңіз, елімізде көптеген ауқымды жобалар қабылданып, бағдарламалар жүзеге асты. Қаншама қаржы жұмсалды. Бірақ барлық жобаның орындалуы 100 пайыз мөлдір болды деп айтсақ, өтірік болар. Тіпті, кейбір үлкен жобалар аяқсыз қалды. Мерзімінен кеш орындалды. Оның барлығына осы бақылау, қадағалау жетіспеді. Бұл тұрғыда үлкен саяси күш Nur Оtan партиясының әлеуетін пайдалану – таптырмас мүмкіндік. Партия атқарушы орган жұмысын бақылап, қадағалап қана қоймай, тиімді жүргеніне, нәтижелі аяқталғанына атсалысса құба-құп. Сондай-ақ партияның тағы бір міндеті елге, қоғамға түсіндіру жұмыстарын түбегейлі жүргізгені дер едім. Жергілікті билік өкілдері мен тұрғындар арасында алтын көпір болып, істің бір жағына шығысу керек.
– Әңгімеңізге рақмет!
Сұхбаттасқан
Бауыржан САБЫРБЕК