Түркістан облсына іссапармен келген ҚР Премьер-Министрі Асқар Мамин Арыс қаласын қалпына келтіру жұмыстарының аяқталуын бақылап, Түркістанда салынып жатқан нысандарды аралады.
Асқар Мамин Түркістан облысына жұмыс сапары барысында ҚР Тұңғыш Президенті – Елбасы Нұрсұлтан Назарбаев пен Мемлекет басшысы Қасым-Жомарт Тоқаевтың қысқа уақыт ішінде Арыс қаласындағы тұрғын үйлер мен нысандарды жылдам қалпына келтіру бойынша тапсырмасын орындау аясында қалада жүргізіліп жатқан жұмыстардың барысын тексерді.
Үкімет басшысы бастаған жұмысшы топ алдымен Темірлан-Арыс-Шардара бағытындағы жол бойынан салынып жатқан тұрғын-үйлерді аралады. Қалалық Дендросаябақ аумағынан бой көтерген бұл үйлер əскери қалашықтың іргесіндегі жарылыс кезінде үйлері жарамсыз болып қалған азаматтарға тапсырылатын болады.
Айта кету керек, бұл аумақта 50 тұрғын үй салу жоспарланған болса, бүгінде мұнда 10 баспана дайын болды. Бұл жоба Болат Өтемұратов қоры есебінен жүзеге асырылып жатыр. Ал инфрақұрылым жүйелерін тарту жұмыстары облыстық бюджет есебінен жүргізілуде.
Арыс қаласының әкімі Мұрат Қадірбек «Бұл әскери горнизонның жанында 1930-шы жылдары салынған ескі барак типтес үйлер болатын. Жарылыс кезінде үйлер жарамсыз болап қалған. Енді сол жердегі 41 отбасыға осы үйлерді табыстаймыз», - деді.
ҚР Индустрия және инфрақұрылымдық даму министрлігінің мәліметтері бойынша, Арыс қаласында жөндеу жұмыстарының 99,3%-ы аяқталды. Нысандарда 134 құрылыс компаниясы, 3,8 мыңнан астам жұмысшы жұмыс істеуде және 211 арнайы техника тартылған.
Арыста 68 әлеуметтік нысан орналасқан (білім беру, денсаулық сақтау және спорт мекемелері), олардың 64-і – күрделі жөндеуді және 4-еуі – толықтай қалпына келтіруді талап етті. Бүгінде 62 нысанда жұмыстар аяқталды.
ҚР Үкіметінің «Арыс-1» темір жол вокзалының жөндеуден өткен ғимараты мен оның алдындағы скверді аралап көрді, «Арыс минералды су» қалпына келтірілген кәсіпорнына барды, Арыс қаласында үйлері толығымен қиратылған 100 отбасыға арналған 50 екі пәтерлі коттеджден тұратын жаңа шағын ауданның құрылысы барысымен танысты. Барлық үйлер аяқталу сатысында тұр, ішкі әрлеу жұмыстары және үй жабдықтарын орнату жұмыстары жүргізіліп жатыр. Асқар Мамин Арыс қаласындағы қайта салынған жеке үйлерге кіріп, олардың тұрғындарымен әңгімелесті.
Үкімет басшысы сондай-ақ Түркістан қаласының әкімшілік, тарихи-мәдени, әлеуметтік маңыздағы нысандарының құрылыс алаңдарын көрді. Түркістан қаласында ҚР Премьер-Министрі болашақ халықаралық әуежайдың құрылыс алаңында болды. Жоба түріктің YDA Holding компаниясымен бірлесіп жүзеге асырылып жатыр. Терминалдың өткізу қабілеті жылына 3 млн жолаушыны құрайды. Нысанды келесі жылдың соңында пайдалануға беру көзделген. ҚР Үкіметінің басшысына әкімшілік, әлеуметтік, тарихи және мәдени маңыздағы нысандар құрылысының барысы туралы баяндалды. Асқар Мамин әкімдік, медиа орталық, конгресс-холл ғимараттарын, «Нұр-Сұлтан» алаңын, Тұңғыш Президент саябағы, Олимпиадалық резервтің спорт мектебін, музыка мектебін, бассейні бар мектеп сарайын, неке сарайын, халыққа қызмет көрсету орталығының ғимаратын, сонымен қатар аттракциондары бар қалалық саябақты, музыкалық фонтанды, амфитеатр, салынып жатқан тарихи-мәдени орталықтың, келу орталығының, Шығыс моншасының, қалалық Арбаттың құрылыс алаңдарын аралады. Жұмыс сапары барысында ҚР Үкіметінің басшысына Түркістан қаласын салудың Бас жоспары көрсетіліп, Түркістан облысында жүзеге асырылып жатқан инвестициялық жобалар таныстырылды.