Қазақстан Президенті Қасым-Жомарт Тоқаев мемлекеттік сапармен Америка Құрама Штаттарына барады. Бұл туралы бүгін Орталық коммуникациялар қызметіндегі брифингте ҚР Президентінің баспасөз хатшысы Берік Уәли айтты.
«Мемлекет басшысы Қасым-Жомарт Тоқаевтың шет елдерге, өңірлерге сапарына қатысты айтар болсам, келесі аптада екі өңірге – Солтүстік Қазақстан және Ақмола облыстарына сапары алдын ала жоспарланған. Уақытын қосымша хабарлаймыз», – деді Б.Уәли.
ҚР Президентінің баспасөз хатшысы Қасым-Жомарт Тоқаевтың АҚШ-қа сапары жоспарланып отырғанын да айтты.
Брифингте Президент көмекшісі Мұрат Нұртілеуов Америкаға сапарға қатысты кейбір деректермен бөлісті. «Өздеріңіз білесіздер, сыртқы саясатта өте белсенді жұмыс жалғастырып келеміз, сабақтастық, жаңа бастамалар бар. Келесі аптада Қасым-Жомарт Кемелұлының БҰҰ Бас ассамблеясының 74-сессиясына қатысуы жоспарланған. Оның барысында Мемлекет басшысы климаттық саммитке қатысады. Содан кейін тұрақты даму жөніндегі жоғары деңгейдегі саммитке қатысатын болады. Сонымен қатар біздің жоспарда Нью-Йоркке барған кезде бірнеше америкалық іскер топтармен тиісті кездесулер бар», – деді ол.