Сәби өліміне кім кінәлі?

Жаңа туған нәрестенің тоңазытқыш камерасында өлуі туралы оқиға елді шошытып, дәрігерлерге деген сенімді көмескілендіріп жібергендей.

Оқиғаның нақты себептері анықталмай тұрып, кеше Атырау облыстық перинаталдық орта­лық­тың 31 қызметкері жұмыстан шығу туралы өтініш жазғаны да мәлім болды. Жаңа туған сәби өлі­мін­ің күрт жоғарылап кету көрсеткішінің артынша тірі туған сәбиді анықтама үшін өлтіру оқи­ғасы еліміздің медицина саласындағы кемшіліктердің тым асқынып тұрғанын айқындап бергендей.

Ресми деректерге сүйенсек, Сыбайлас жемқорлыққа қарсы іс-қимыл агенттігі төрағасының орын­басары Шыңғыс Қабдолла елордада өткен брифингте «Гип­пократтың антына адал болуды уәде еткен денсаулық сақтау са­ла­сының қызметкерлері жаңа туған нәрестені тоңазытқыш камераға салып өлтірді деген күдікке ілінді. Тексеру нәти­же­сінде анықтал­ған­дай, сәби қателіктің салдарынан құ­жат бойынша өлі туғандардың қа­тарына енгізіліп кеткен. Шын­туайтында ол тірі болған. Ба­ланың тірі екенін білгеннен кейін дәрі­гер­лер оңалту амал­дары бойынша шұ­ғыл шара­ларды қабылдаудың ор­нына рә­сімделген құжат бо­йын­ша, сәбиді шетінеп кеткенше сол жерде қал­дырған. Дәрігердің әре­ке­тінің бір себебі – толты­рылып қой­ған құжат. Ол түзе­тілмеген» де­ген болатын. Пер­зентхана ­орта­лығының бас­шысы мен әйел­ді бо­­сандырған акушер-гине­колог­тың үстінен қылмыстық іс қозғалды.

Денсаулық сақтау министрі Елжан Біртанов Атырау облы­сындағы сәби өлімі туралы мә­лім­деме жасап, сәбидің жақын­дары мен отбасына барлық әріптестері атынан көңіл айтты.

«Бала өліміне әкеп соққан қа­сақана медициналық көмек көр­сетпеу туралы айтыпты, есті­генде таңғалдық» деді ол Ден­саулық сақтау министр­лігінде өткен ­бри­фингте. Е.Біртанов оқиға ­бо­йынша Денсаулық сақтау ми­нистрлігінің ұстаны­мын жа­рия­лады. «Біздің ұста­нымымыз – тергеу нәтижесі мен барлық са­раптаманың жүр­гі­зілуін күту. Ме­дициналық қыз­мет­керлер та­рапынан заңсыз әре­кет­тердің болған-болма­ғанын анық­тау. Со­дан кейін ғана толыққанды пікір бере аламыз» деді ол.

Сонымен бірге, министр оқи­­ғаның қызу қоғамдық тал­қылауға түскенін және барлық медици­налық қызметкерлерге күйе жа­ғыл­ғанын айтты. «Ме­ніңше, ме­ди­циналық қызмет­кер­лердің ба­сым бөлігі өз еңбе­гін адал атқа­рып ке­ле­ді. Сон­дықтан жалпыға кінә ар­тудың қажеті жоқ» деді Е.Бір­танов.

Десек те, Атырау облыстық пе­ринталдық орталықтың 31 қызмет­кері жұмыстан шығу туралы өтініш жазғаны да мәлім болып отыр.

Атырау облысы әкімінің баспа­сөз қызметінің хатшысы Серікжан Ерментаевтың берген мәліметіне сүйенсек, жұмыстан шығуға арыз берген қызмет­керлермен Денсау­лық сақтау министрлігі, сала бас­қармасы, кәсіподақ ұйымдары­ның өкіл­дері диалог орнатуға әрекет етіп жатыр. Олардың әр­қайсы­сы – күн сайын адам өмірі үшін кү­ресіп жүрген мамандар. Пер­зент­хана қызметкерлері қазір жұмыс орындарында.

Айтарлығы, Атырау облыс­тық перинталдық орталықта орын ал­ған жағдай мәлім болған соң, өңір­ге Денсаулық сақтау вице-министрі бастаған респуб­ликалық меке­ме­лердің жетекші мамандары келді.

Атырау облыстық денсаулық сақтау басқармасының басшысы Мәншүк Аймұрзиеваның ай­туынша, облыстық перинатал­дық ор­талық дәрігерлеріне елі­міздің бас­қа аймақтарынан ме­дицина қыз­меткерлері көмекке келіп жатыр.

– 2019 жылдың басынан бері Атырауда қалалық перзентха­наны екінші деңгейден үшінші деңгейге ауыстыру жұмысы жүр­гізілді. Бо­сандыруды ұйымдас­тыруға бағыт­талған жоспарлы шара аясында об­лыстық пери­наталдық орта­лық­тан анесте­зио­лог-реаниматолог ауысты­рыл­ды. Екі неонатолог келді. Бә­рі де – тәжірибелі, еңбек өтіл­дері бар мамандар. Аталған ауруханаға Ақтөбе облысынан тағы екі маман-неонатолог келеді.

Қалалық перинаталдық ор­та­лық жүз пайыз жабдықтал­ған, – дейді Мәншүк Аймұр­зиева.

Қалалық перзентхана ауыр дер­ті бар жүкті әйелдерге бо­сандыру бойынша сапалы ме­дициналық қызмет көрсетуге дайын.

Облыстық денсаулық сақтау бас­қармасының басшысы М.Ай­мұрзиеваның айтуынша, облыстық перинаталдық ор­талықтың да жұмысы күшей­тіледі. Жұмыстан кеткен дәрі­герлерді Атыраудан, еліміздің басқа да аймақтарынан келген мамандар алмастырады. Ай­мақта қыркүйектен бастап бала өлімін азайту бойынша жоспар­ланған шаралардың орындалуын бақылайтын мониторинг тобы жұмыс істейді. Реаниматолог, нео­натолог, акушер-гинеколог дәрі­герлер келген. Педиатрия және балалар хирургиясы ұлттық ғылы­ми орталығының директоры Риза Боранбаева бастаған жалпы саны жеті маман қазір Атырауда. Со­нымен қатар республикалық орталықтардан акушер-гинеколог, Нұр-Сұлтан қаласындағы Ана мен бала ұлттық ғылыми орталығынан анестезиолог-реанимато­лог­тары да атыраулық дәрігерлер­мен бірге бала өлімін азайтуға күш салуда.

Атырауға іссапармен келген Денсаулық сақтау вице-ми­нистрі Ләззат Ақтаева облыстық, қалалық перинаталдық орта­лықтардың жұ­мысымен таны­сып, дәрігерлермен жүздесіп, нақты тапсырма берді.

Атырау облысы