Күйеуі өртеп жіберген елордалық әйел ауруханада көз жұмды. Бұл туралы Нұр-Сұлтан қаласындағы Травматология және ортопедия ғылыми-зерттеу институты хабарлады. «Денесінің 75 пайыздық термиялық күйігі бар науқас 2019 жылдың 10 қарашасында сағат 1.35-те қайтыс болды»
Естеріңізде болса, осыдан бір ай бұрын БАҚ-та елордалық ер адам әйелінің үстіне бензин шашып, өртеп жібергені жайлы ақпарат жарияланды. Ресми мәліметке сүйенсек, оқиға 6 қазан күні шамамен 11:40-та болған. Қалалық полиция қызметіне Мамандандырылған халыққа қызмет көрсету орталығы орналасқан аялдамада денесін күйік шалған әйелдің отырғаны хабарланып, аталған факті бойынша құқық қорғаушылар күдікті ретінде әйелдің 43 жастағы күйеуін ұстады. «Отбасылық жанжал кезінде ер адам әйелін қоқысқа алып келіп, газбен отқа орағаны белгілі болды. Кісі өлтіру әрекеті бойынша сотқа дейінгі тергеу амалдары жүріп жатыр. Уақытша ұстау абақтысына қамалған азамат кінәсін мойындады» деп мәлімдеген елордалық полиция қызметі.
Әйелдің жағдайы туралы мәлімет ақпарат құралдарында үздіксіз жарияланып тұрды. Жәбірленушіні жедел жәрдем қызметі Травматология және ортопедия ғылыми-зерттеу институтына жеткізген күні дәрігерлер оның денесінің 75 пайызы термиялық күйікке шалдыққанын, ол медицинада өте қатты күйік шогы деп саналатынын айтты. «Аса ауыр күйік шогы, жоғары тыныс алу жолдарының термальді-ингаляциялық күйік зақымдануы және 2-3 дәрежелі конъюнктиваның күйігі анықталды. Науқастың жағдайы өте ауыр» деген болатын дәрігер-реаниматолог Татьяна Лебига.
Осы оқиғадан кейін тура тоғыз күн өткенде Травматология және ортопедия ғылыми-зерттеу институтының мамандары 38 жастағы келіншектің жағдайы әлі де оңалмай жатқанын хабарлады. «Науқастың реанимация бөлімшесінде жатқанына 9 күн болды. Жағдайы өте ауыр, күйген кезде алған қорқыныштан арылды. Гемодинамикасы тұрақсыз. Өмірлік маңызды органдардың қызметі дәрі-дәрмектің күшімен жұмыс істеп тұр. Болжам күмәнді. Тірі қалу мүмкіндігі жайында айтуға әлі ерте» деді Анестезиология, реанимация және қарқынды терапия бөлімшесінің дәрігер-реаниматологы Ербол Төлегенұлы. Сондай-ақ дәрігерлер науқастың зонд арқылы тамақтанатынын, өкпесі жасанды жолмен тыныс алып жатқанын естірткен.
Ал 23 қазан күні әйелдің есін жиғаны, өздігінен дем ала бастағаны айтылды. Бірақ дәрігерлер «оны жақсарды деп айту қиын, өйткені оның бүйрек қызметі бұзылған» деп, науқасқа бүйрек жеткіліксіздігі бар деген диагноз қойған. Ақыры науқастың күйік дәрежесі жағдайының ауырлығынан ұзақ емдеуден нәтиже болмай, дәм-тұзы таусылғаны хабарланды.
Марқұмның анасы Astana телеарнасында күйеу баласы қызына бұған дейін де жәбір көрсетіп келгенін айтыпты. Он алты жыл отасқан отбасының 6 баласы бар, үлкені – 16-ға толса, кішісі – төртте. Ерлі-зайыптының арасы алшақтауына қызғаныш себеп болған көрінеді. Анасының айтуынша, қызы осы айда заңды түрде ажырасып, Түркістан облысынан елордаға көшіп келіп, жаңа өмір бастауға әрекет етіпті. Алайда күйеу баласы қызының қыр-соңынан қалмай, ақыры ажалына себепкер болды.
Қызғынышқа бой алдырып, әйелін құрбан еткен 43 жастағы ер адамның дәл қазір қандай күйде екені бізге беймәлім. Күдікті тергеу изоляторында отыр. Нұр-Сұлтан қаласы полиция департаментінің хабарлауынша, оның үстінен «Адам өлтіру» бабы бойынша қылмыстық іс қозғалған.