Қаракемер ауылына 70 жыл күткен газ берілді

Сегіз жылдан бері бауын тапса, байлауын таппай келген түйткілдің түйіні осылайша тарқатылды.  «Жұмыспен қамту жол картасы» мемлекеттік бағдарламасы шеңберінде қолға алынған құрылысты  «Газ-Сервис» ЖШС  182 миллион  270 мың теңгеге жүргізген.  Мамыр айында басталған  құбыр тарту жұмыстары осы  дүйсенбіде  мәресіне жетіп, енді «Жамбыл-Жылу» ЖШС 100 мың теңгеге газды үйме-үй кіргізіп беруде. Басқа аудандарда  құны 300 мың теңгеден кем болмай жатқанда, «Жамбыл-Жылу» мекемесінің қолжетімді бағасы  бұқара үшін көп демеу болуда.

Жамбыл ауданы  әкімінің міндетін атқарушы Ерлан Қыдыралыұлы, аудандық мәслихат хатшысы Рүстем Бегалиев және  облыстық мәслихаттың депутаты Масат Берік  каракемерліктердің  қуанышына ортақтасып,  жылы лебіздерін жеткізді. Ал ауыл ақсақалы Ахатай Балқыбеков ауылға газ кіргізуге атсылқан барша азаматтарға алғысын білдірді.  Алтын алқа иегері Алшакүл Қалыбаева да көптен күткен қуанышқа қол жеткізгендеріне сенер-сенбесін білмей, көз жасқа  ерік берді.   – Шырағым, мен 86 жастамын. 10 баланың анасымын. Қаракемерге келін болып түскеніме 70 жыл болыпты. Содан бері ауылдамын. Еш жаққа кеткенім жоқ. Ауылымыз Құдайға шүкір дамып келеді. Міне, бүгін ауылға газ келді. Бұл да болса біз үшін үлкен қуаныш. Бәріне рақмет айтқым келеді. Мемлекетке, облыс, аудан басшыларына, ауыл әкіміне, жергілікті әкімшілік қызметкерлеріне  алғысым шексіз. Әрдайым демеп, қара халықтың мұңын мұңдап жүретін Nur Otan партиясына дән ризамын.  Өркендері өссін. Ел үшін қызмет етіп жүре берсін. Еліміз дамысын, анау, отыз елдің қатарына кіреміз деп жүрміз ғой. Соның қатарына кірейік, болашақта соларға үлгі болатын ел болайық, – деген әжей  көпшілікке ақ батасын берді.   Осылайша, қаракемерліктер 70 жыл күткен көгілдір отындарына қол жеткізіп отыр. Бұл сөз жоқ, биліктің бұқара үшін жасаған тағы бір игі ісі. Ендеше қаракемерліктердің  қуанышы еселеніп, ауылдың әлеуеті арта берсін деп тілейміз.

Саятхан САТЫЛҒАН, Жамбыл облысы