Түркияда отырған трансұлттық қылмыстық топ басшыларына Нұр-Сұлтаннан ақша аударып жүрген Әзірбайжан азаматы ұсталды, – деп хабарлайды AstanaTV.
Күдіктінің құрықталған видеосын Ұлттық Қауіпсіздік комитеті жариялады.
Баспасөз қызметінің хабарлауынша, қылмыстық топ белсендісі қаңтардың 15 күні қолға түскен.
Нұр-Сұлтанда кәсіпкерлерден ақша бопсалап жүрген C есімді шетел азаматына қатысты «Трансұлттық қылмыстық топты қаржыландырды» деген айып тағылды.
Осыған ұқсас қылмыстық топ былтыр қыркүйектің 10 күні қолға түскен еді. Олар жергілікті кәсіпкердің бірін қорқытып, Toyota автокөлігін тартып алмақ болған кезде қолға түсті.
Ұстау кезінде қылмыскерлерден 11 оғы бар «Макаров» тапаншасы мен 5 оқты травматикалық қару тәркіленді.