Елдің тұрақтылығы мен бақуаттылығы халқының тұрмыс-тіршілігіне, өмір сүру ортасындағы көңіл күйіне тікелей байланысты. Ашу мен қорқынышта өмір сүретін елде тәртіп орнамайды. Бейбітшілік пен келісім болған елдің ертеңі жарқын, халқы алаңсыз өмір сүреді. Осындай ұранмен құрылған «Еуропа-Азия Бейбітшілік және келісім маршы» Нұр-Сұлтан қаласынан алғашқы сапарға аттанбақ.
Кеше елордадағы Достық үйінде «Еуропа-Азия Бейбітшілік және келісім маршы» халықаралық жобасы аясында мәдени-бұқаралық іс-шара өтті. Ақпарат және қоғамдық даму, Мәдениет және спорт министрліктері, Бейбітшілік және келісім маршының атқарушы комитеті мен Нұр-Сұлтан қаласы әкімдігінің Ішкі саясат басқармасының қолдауымен ұйымдастырылған шара екі күнге созылмақ. Бірінші күні ұйымдастырушылар баспасөз өкілдеріне шерудің алға қойған міндетін түсіндіріп, артынша қатысушылар дөңгелек үстелде марштың маңыздылығы туралы ойларын ортаға салды. Бұдан кейін бірнеше министрліктің өкілдері, Нұр-Сұлтан қаласы әкімдігі мен «AMANAT» партиясы жанындағы Жастар қанатының Нұр-Сұлтан қаласындағы филиалы қызметкерлері шерудің қатысушыларымен бірге арнайы дайындалған концертті тамашалады.
«Бүкіл елдің халқы бір үйдің баласындай бірлікте өмір сүргенін қалаймын. Ұлт пен дінге бөлінбей, ынтымақта, ұйымшылдықта өмір сүруге шақырамын. Ұрпағымыз бейбіт елде тату-тәтті өмір сүру үшін шараға қатысуға бірден келістім. Өзіммен бірге екі баламды да алып келдім», – дейді бес баланың анасы, шеруге қатысушы Динара Әкімбекова. Ол ұлттар арасындағы достықты дәріптейтін марш туралы құрбысынан естіп, біліпті. Ал Өзбекстан азаматы Әлішер Мирахмедов Нұр-Сұлтан қаласына келгеніне қуанышты екенін жеткізді. Халық достығын әспеттейтін қозғалыстың шеруіне қатысатынын мақтаныш ететінін айтқан ол: «Мені бұл маршқа қатысуға ешкім үгіттеген жоқ. Қозғалыстың мақсаты мен идеясын естіген кезде бірден қатысуға шешім қабылдадым» деп отыр.
Қозғалыстың Қырғыз Республикасындағы жетекшісі Мээрим Эсеналиева шерудің жоғары деңгейде өтуі үшін өз еліндегі мемлекеттік ұйымдар да жан-жақты қолдау көрсеткенін алға тартты. Айтуынша, адамның бақытты ғұмыр кешуі ұлттың тілі мен дініне, дәстүріне қарамайды. Ең маңыздысы, әрбір адамның жүрегі «бейбітшілік» деп соққанда ғана қой үстінде бозторғай ұялаған тыныш заман орнайды. «Ең басты ұстанымымыз – халықты бейбітшілік пен келісімге шақыру. Сіздерді 9 шілде күні Бішкекте асыға күтетін боламыз», – деді Мээрим Тұрарбекқызы.
Бейбітшілік және келісім маршының атқарушы директоры Руслан Абдуллиннің айтуынша, шеруді ұйымдастырушылар жеті жыл бойы дайындалыпты. Бірінші кезеңде олар Еуропа мен Азияның бірнеше қаласында болады. Атап айтқанда, Қазақстанның – 10, Қырғыз Республикасының – 1 және Ресейдің 5 қаласын аралайды. Шеруге 46 адам өтініш білдірсе, Нұр-Сұлтан қаласындағы алғашқы шараға 28 адам келді. Қатысушылардың санына шектеу жоқ. Өйткені халықтар арасындағы достықтың жалауын желбіретіп, ұлттар арасындағы махаббатты оятқысы келетін кез келген адамның шеруге қатысуға мүмкіндігі бар. «Біздің марш саясат пен діни ұрансыз өтеді. Тағы бір айтарымыз, марш мемлекеттік бюджетке салмақ салмайды. Өйткені халықтық марш халықтың өз ақшасына ғана өткізіледі. Халық өзі ұйымдастырып, өзі қаржылай қолдау білдіріп отыр. Бірақ ұйымдастыру ісі мемлекеттік ұйымның көмегімен іске асқанын баса айту керек. Кез келген қоғамдық істің жүзеге асуына мемлекеттің қолдауы маңызды. Марштың дайындық жұмыстарына қол ұшын берген Нұр-Сұлтан қаласы әкімдігіне алғыс білдіремін. Соның арқасында елорданың төріндегі Достық үйінде шеруімізді бастағалы отырмыз», – деді Руслан Абдуллин. Бұдан бөлек, ол марштың тағы бір пайдасы – отандық кәсіпкерлердің өнімін жарнамалауға мүмкіндік бар. Мысалы, ешбір елде жоқ табиғи денсаулыққа пайдалы ZHANTAQ өнімінің өркен жайып, әлемдік брендке айналуына шеру қатысушылары барынша қолдау көрсетпек.