Иордания астанасы Амман қаласында бокстан өтіп жатқан Азия чемпионатында Жайна Шекербекова жеңімпаз атанды, - деп хабарлайды ҚазАқпарат.
Әйелдер арасында қазақстандықтардан финалға бірінші болып 48 келіге дейінгі салмақта Алуа Балқыбекова шығуы керек еді. Алайда қарсыласы жарақат алып қалғандықтан, жеңіс Алуаға берілді. Сөйтіп әлем біріншілігінің күміс жүлдегері А.Балқыбекова ресми түрде екі мәрте Азия чемпионы атанды.
Ұлттық құрамадағы тәжірибелі боксшылардың бірі, Азия чемпионы, Азия ойындарының күміс жүлдегері Жайна Шекербекова 54 келіге дейінгі салмақта тайландтық Джутамас Джитпонгпен алтын жүлдені сарапқа салды.
Бәсеке өте қызу өтті. Боксшылар алтын үшін аянып қалған жоқ. Төрешілер бірауыздан жеңісті Жайнаға берді – 5:0.
Осылайша, Жайна Шекербекова Қазақстан қоржынына екінші алтынды салды.
Иордания астанасы Амман қаласында бокстан өтіп жатқан Азия чемпионатында Карина Ибрагимова жеңімпаз атанды.
Әлем чемпионатының қола жүлдегері Карина Ибрагимова 57 келіге дейінгі салмақта Токио Олимпиадасының жеңімпазы, жапониялық Ирие Сенамен жұдырықтасты.
Карина жартылай финалда әлем чемпионы, филиппиндік Нести Петесионы жарыс жолынан шығарып тастап еді. Осы Н.Петесионы олимпиада финалында И.Сена ұтқан болатын.
Карина финалда қолы мен бойының ұзындығын пайдаланып, дәл соққы жасауға тырысты. Ол солай болды да. Екінші раундта жапониялық боксшы ескерту алып, ұпайы шегерілді. Дегенмен үшінші кезең соңында Карина нокдаун алды. Есеп – 3:1, К.Ибрагимова чемпион атанды.
Осылайша, Қазақстан қоржынына үшінші алтын түсті.