Қостанайда «АMANAТ» партиясы жанындағы Көлік және логистика комитетінің көшпелі отырысы өтті. Онда теміржол және жүк тасымалындағы түйткілді мәселелер талқыланды.
Комитет төрағасы, Мәжіліс депутаты Самат Ақышев Қостанай облысындағы жүк тасымалдаушы компания өкілдерінің арыз-шағымдарын тыңдады.
«Шетелге жүк тасуға рұқсат халыққа қызмет көрсету орталығында жеке кәсіпкерлерге беріледі. Жүк көлігі жоқ кәсіпкерлер де бұл құжатты сатып алып, тасымалдаушыларға екі есе қымбат бағаға сатады. Ал нақты жүк тасымалымен айналысатын компанияларға жетпей қалады», – дейді кәсіпкер Алдан Менкеев.Өз кезегінде депутат Самат Ақышев бұл мәселе бақылауға алынатынын айтты. Жиында Қостанайдағы қоғамдық көліктерді жаңарту жайы да сөз болды. Жолаушылар тасымалымен айналысатын кәсіпорындар автобус сатып алуға ақшамыз жетпейді деп отыр. Облыс орталығы үшін өткен жылы тек 5 автобус сатып алынды. Іс-шара соңында Комитет төрағасы түйткілді мәселелердің жай-жапсарын біліп, анық ақпарат алу үшін осындай көшпелі отырыстың тиімділігі жоғары екенін атап өтті. Самат Ақышев аймақтағы кәсіпкерлер ұшырасып отырған кедергілерді тиісті министрлікке жеткізетінін айтты.