Танымал кәсіпкер, "Қайрат" АФК қамқоршылық кеңесінің төрағасы Игорь Мажинов 52 жасына қараған шағында көз жұмды, – деп хабарлайды Aikyn.kz Massaget.kz-ке сілтеме жасап.
Бұл туралы "Қайрат" АФК әлеуметтік желідегі парақшасында бөлісті. Игорь Мажинов жүрегіне ота жасалып жатқанда қайтыс болған.
Айта кетейік, Игорь Мажинов 1972 жылы 24 ақпанда дүниеге келген. Ол – экономика ғылымдарының кандидаты, Ресей ғылым академиясында кандидаттық диссертация қорғаған.
Игорь Мажинов әр жылдары Vertex ААҚ, "Альянс Банк" АҚ, "Достық қонақ үйі" АҚ, "ХОЗУ корпорациясы" ЖШС-ында басшылық қызметтерді атқарған. "Bank RBK" АҚ Басқарма төрағасы және Директорлар кеңесінің мүшесі болды.
Ол "Мегаспорт" футбол клубын ("Астана" ФК) ұйымдастырушылардың бірі болған еді. БАҚ мәліметінше, ол танымал кәсіпкер, "Қазақмыс Холдинг" президенті Владимир Кимнің күйеу баласы.
Еске салайық, Игорь Мажинов Bank RBK-дан 144 миллиард теңге жымқырды деген күдікке ілінген еді.