Бүгінде елімізде мемлекет пен азаматтар арасында түрлі бағытта кері байланыс арналары жұмыс істейді. Түркістан облысы әкімінің орынбасары Бейсенбай Тәжібаев бекітілген кесте негізінде әкімдіктің «Ашық әкімдік» және «AMANAT» партиясының Түркістан облыстық филиалы қоғамдық қабылдау алаңында әр тоқсанда бір реттен облыс халқын қабылдап, өз саласы бойынша өтініш-тілектерін білдіре келген тұрғындардың мұң-мұқтажына құлақ түріп келеді.
Облыс орталығы Түркістан қаласында өткен «Ашық әкімдік» кеңсесіндегі кезекті жеке қабылдау кезінде сан түрлі сұрақ пен проблема ортаға салынды. Бейсенбай Дәулетұлы жетекшілік ететін салалар білім, денсаулық, жастар бағыттарынан бөлек жұмыссыздық, мүгедектігі бар азаматтардың талап-тілектері қаралды.
Мәселен, Сауран ауданынан келген азамат мектеп директорын ротациялау жайын сөз етті. Жетісайлық кәсіпкер жекеменшік балабақша мәселесін қозғады. Оған мониторинг тобының хаттамасына сәйкес кемшіліктерді жою қажет екені түсіндірілді. Арыс қаласының тұрғыны аурухана дәрігерлерінің біліктілігіне шағымданып, медициналық мекемені КТ аппаратымен қамтуды сұрады. Айта кетейік, қазір облыс дәрігерлері біліктілігін арттыру мақсатында Астана қаласында тәжірибе алмасуда. Сонымен қатар резидентура бойынша білім алуға облыс жастарына 139 грант қарастырылған. Ауылдық жерлерде маман тапшылығын шешу үшін білікті жас дәрігерлерді жоғары оқу орындарында даярлап, елді мекендерге жұмыс істеуге жіберу жоспарлануда. Облыс бойынша 3 КТ аппараты алынып, біреуін Арыс қаласында орнату көзделіп отыр. Денсаулық саласы бойынша шағым айта келген азаматқа осындай жетістіктер түсіндіріліп, барлығы да рет-ретімен түзеліп келе жатқаны айтылды.
Түркістан қаласынан келген азаматшалар жекеменшік балабақшада 6 ай көлемінде еңбекақысыз жұмыс істеп жүргенін алға тартты. Бұл мәселе бойынша өтініш иелерінің арызы негізінде облыстық Бақылау жөніндегі басқармасы тарапынан заң шеңберінде қаралады және аталған мекемеге тексеру жұмыстары жүргізілмек. Бұдан бөлек, электронды қоларба алу, мектепке жұмысқа орналасу, аудандық Жастар орталығының жұмысы туралы ұсыныстар айтылды. Бейсенбай Тәжібаев көтерілген әрбір мәселе хаттамаға енгізіліп, заң шеңберінде қаралатынын жеткізді. «Жалпы, әрбір өтінішті заң аясында талдап, жауабын міндетті түрде жолдайтын боламыз. Ай сайынғы қоғамдық қабылдауымда өңір халқының мұң-мұқтажын тыңдап, оң шешілуіне ықпал жасауға әркез дайынмын», – дейді облыс әкімінің орынбасары.
Ал «AMANAT» партиясының Түркістан облыстық филиалы қоғамдық қабылдау алаңында тұрғындарды қабылдаған Бейсенбай Дәулетұлына білім, денсаулық және әлеуметтік салаға қатысты өтінім қалдырғандар қатары басым болды. Қабылдауға алдын ала жазылған бірқатар тұрғын денсаулық және білім саласындағы кейбір түйткілді мәселелердің оңды шешілуіне ықпал етуін өтінді.
Түркістандық тұрғын Д.Ташекеева мектептен босатылғанын айтып, қайта жұмысқа орналасуға көмектесуін сұрады. Бейсенбай Дәулетұлы Түркістан облыстық Білім басқармасы басшысының орынбасары Ж.Нұрпейісовке өтініш иесін тұрақты жұмысқа орналастыру үшін бос орындарға конкурс жариялап, заңға сәйкес жұмысқа орналастыруды қарастыру бойынша тапсырма берді.
Ал Жетісай ауданының тұрғыны П.Биматов ауданның орталық ауруханасында 20-30 жылдан астам қызмет етіп келе жатқан ақ халатты абзал жандарға «Ерен еңбегі үшін» медалін беру туралы ұсынысын жеткізді.
Облыс әкімінің орынбасары аталған ұсыныстың дұрыстығын анықтап, бұл бойынша Түркістан облыстық Денсаулық сақтау басқармасы басшысының орынбасары Б.Сатыбалдыға көпжылдық еңбегі бар азаматтарды марапаттау заң аясында жүргізілуі керегін айтты. Қабылдауда жер мәселесі де көтерілді. Түркістан облыстық Жер қатынастары басқармасына жеке қабылдаудың хаттамасы негізінде өтініш иелерінің мәселесін қарап, айтылған ұсыныстар бойынша жауапты мамандарға тапсырма берді.
Тағы бірде өткен қабылдауда тұрғындар тарапынан «Жаңа қала» шағынауданында балабақша ашу туралы ұсыныс берілді. Бала күтіміне байланысты жалақысы сақталмайтын демалысынан, жұмысқа қайта орналасу, оқу грантына қатысты түйткілдер де айтылды. Тұрғындардың бірі денсаулық жағдайына байланысты мүгедектік тобын қайта тағайындауды сұраса, жауапты басқарма ай, тоқсан сайын мүмкіндігі шектеулі азаматтарға арналған үйлестіру кеңесін өткізіп отырса деген тілегін жеткізді. Жазылушылардың мүмкіндігі шектеулі жандарға қолдауды күшейту, инклюзивті орталық ашу жөнінде де өтініштері бар. Жұмыстан себепсіз шығып қалған мұғалім соттың шешімімен келіспейтінін, тағы бір тұрғын мүгедектігіне қолдау шараларын жүргізуді және тұрғын үй салуға жер учаскесін сұрады. Ашық форматта өткен бұл жолғы қабылдауға Шымкент, Түркістан және Кентау қаласынан, Сауран, Ордабасы, Қазығұрт, Сарыағаш, Түлкібас, Бәйдібек аудандарынан 16 азамат келді. Облыс әкімінің орынбасары Бейсенбай Дәулетұлы жеке қабылдауда тұрғындар тарапынан көтерілген әрбір мәселе хаттамаға енгізіліп, заң аясында тиісті жұмыстар жүргізілетінін атап өтті. Сонымен қатар өтініштер бақылауға алынатынын жеткізді. Жауапты басшыларға мәселелерді зерделеп, қысқа мерзімде шешуді тапсырды. Қоғамдық қабылдауларда көтерілген кез келген мәселе назарға алынып, бірі сол мезетте шешімін тапса, бірінің оңтайлы шешілуі уақыт талап етеді.
Назгүл НАЗАРБЕК,
Түркістан облысы