Nur Otan партиясының респубикалық қоғамдық қабылдау бөлмесінде Қаржы вице-министрі Руслан Еңсебаев азаматтарды қабылдады. Вице-министрге Маңғыстау, Түркістан, Шығыс Қазақстан облыстарының тұрғындары бейнебайланыс арқылы шағымдарын жеткізсе, одан бөлек астаналық екі тұрғын арыздары мен ұсыныстарын тікелей айтуға мүмкіндік алды.
Азаматтардың шағымдары аудиттік тексерулерге, зейнетақымен қамтуға, бюджет қаржысын қайтаруға, салықтан жалтарғандарға қатысты туындаған мәселелермен байланысты болды. Мәселен, Ақтау қаласының тұрғыны Марат Айбергенов кеден органдарының құқық қорғау бөлімінде жұмыс істеген еңбек өтілі үшін зейнетақы тағайындауды сұрады.
– Зейнетақысыз қалған экономикалық тергеу қызметінің бұрынғы қызметкерімін. Мен сияқты зейнетақы ала алмай жүрген жүзге жуық адам бар, кезекте тағы 200 қызметкер тұр. Құқық қорғау органдарынан жұмыстан шыққан азаматтардың барлығы зейнетақы алуға құқылы. Алайда, 2014 жылға дейін құқық қорғау органдарының қатарында болғанына қарамастан, үкіметтің қаулысына кеден органдары кірмей қалған. Сол себепті, біз зейнетақы ала алмай жүрміз, – дейді М.Айбергенов.
Вице-министр аталған мәселемен таныс екенін және оны Қаржы министрінің өзі жеке бақылауына алғанын жеткізді. Ал Қаржылық мониторинг комитетінің қызметкері Шынар Әлжанова 25 шілдеде арнайы комиссия құрылғанын, қазіргі таңда бұл мәселені комиссия қарап жатқанын айтты.
Қоғамдық қабылдауға келген тұрғындардың арасында арыз-шағыммен емес, ұсыныспен келгендер де болды. Мәселен, астаналық Самат Сағиданов қолданыстағы «Мемлекеттік бюджет туралы» заңына өзгерістер енгізу, шағын және орта бизнес субъектілеріне салық салу жүйесін жетілдіру арқылы мемлекет бюджетіне түсетін қаржыны молайтуға қатысты бірнеше ұсыныс айтты.
Кездесу соңында қабылдауға келген тұрғындардың ұсыныс-тілектері ескеріліп, алдағы уақытта жан-жақты қарастырылатыны айтылды.
Клара НАҚЫП