Қызылордада «Бастауыш ұйым – партия тірегі» атты тақырыпта ұлттық спорт түрлерінен бастауыш партия ұйымдары арасында турнир өтті. Облыстық деңгейде ұйымдастырылған сайыста қатысушылар «Тоғызқұмалақ», «Қол күресі», «Асық ату», «Бес асық», «Арқан тарту» спорт түрлері бойынша бақ сынады.
Облыстық деңгейдегі сайысқа аумақтық кезеңде жеңімпаз деп танылған 11 бастауыш партия ұйымдары қатысты. Жарысты облыстық партия филиалы төрағасының бірінші орынбасары Ақмарал Әлназарова ашып, сайысқа қатысушыларға сәттілік тіледі.
– Өздеріңізге белгілі, бастауыш ұйымдар – кез келген саяси партияның түп негізі. Елбасы, Nur Otan партиясының Төрағасы Нұрсұлтан Назарбаев Nur Otan партиясы Саяси кеңесінің кеңейтілген мәжілісінде жария еткен «Сенім. Диалог. Болашаққа нық қадам – Nur Otan партиясының 7 серпіні» атты партия жұмысын жүйелі жаңғырту бағдарламасында партия алдындағы негізгі міндеттерді атап өтіп, оларды табысты жүзеге асыруда партияның «ядролық» электоратын қалыптастыруды айтқан болатын.
Еліміздегі басты саяси күш Nur Otan партиясының өкілдері ретінде алдымызда, Елбасы атап өткендей, халыққа жақын болып, оның мұң-мұқтажын білу мен оған қолдау білдіру, қоғамда туындайтын мәселелерді шешуге көмектесіп, халықпен кері байланыс орнату құралдарының тиімділігін арттыру міндеттері тұр. Сондықтан бастауыш ұйымдар заман талабына сай жаңашыл болып, саяси бәсекеде өмірді жақсартуға барынша қабілетті болуы керек. Бастауыш партия ұйымдары белсенді қоғамдық-саяси жұмыстың орталығына айналуы тиіс. Сондықтан бүгінгі ұйымдастырылып отырған турнирдің негізгі мақсаты біріншіден, ұлттық спортты дамыту мен партияластарымыздың саламатты өмір сүруін көздесе, екіншіден партия мен бастауыш ұйымдар арасындағы кері байланысты орнату, бір-бірімізбен тәжірибе алмасу, алдағы міндеттерді дәл осындай ауызбіршілікте жүзеге асыру, – деді Ақмарал Әлназарова.
Әр айналым талас-тартысқа толы болды. Командалар өздерінің мықтылығын сайыс кезінде барынша дәлелдеп бақты. Жалпыкомандалық есепте мықты ойын өрнегін көрсеткен Қазалы аудандық партия филиалының «Жанқожа» бастауыш партия ұйымы жарыс жеңімпазы атанып, 150 мың теңге қаржылай сыйлыққа және партия кубогына ие болды. Ал екінші орынды иеленген Арал аудандық партия филиалының «Сарыбұлақ» бастауыш ұйымы 100 мың теңге ақшалай сыйлықпен марапатталса, Қызылорда қалалық партия филиалының «Шаңырақ» бастауыш партия ұйымы 50 мың теңге қаржылай сыйақыны қанжығалап, үздік үштікке кірді.
Сондай-ақ ұйымдастырушылар әрбір сайыс түрлері бойынша жеңімпаз бастауыш партия ұйымдарын марапаттады. Сайыс қорытындысына сай, жеңімпаздарға алғысхаттар мен бағалы сыйлықтар табысталды.
Әбілмансұр ЖАСАН