Түркістандық түлек ҰБТ-дан 137 балл жинады

Биыл түркістандық түлектер ҰБТ-дан жоғары балл алып жатыр. Ең жоғары  балл жинаған түлектің есімі белгілі болды. Түлкібас ауданының оқушысы Сүйрік  Қасым 137 балл жинады. Бұл туралы облыстық Өңірлік коммуникациялық қызметінде өткен брифингте облыстық білім басқармасы басшысының міндетін атқарушы Ардақ Садықова мәлімдеді.

Түркістандық түлек ҰБТ-дан 137 балл жинады

Бүгін Түркістан облыстық Өңірлік коммуникациялық қызметінде өткен брифингте білім басқармасы басшысының міндетін атқарушы Ардақ Садықова бүгінгі күннің қорытындысымен облыстың орта балы – 69,9 балды құрағанын жеткізді.

Ардақ Садықованың мәліметінше, облыс бойынша 2018-2019 оқу жылында 11 сыныпты 24 513 оқушы бітірді. Қазіргі таңда 24 513 түлектің 16364-сі (66,8%) ҰБТ тапсыруға өтініш берген. 20 маусымда 9 аудан, қалада 332 мектептен 4 190 бітіруші тест тапсыруға өтініш берген. Қазірдің өзінде түркістандық түлектер жоғары балл алып үлгерген.

«Ең жоғары 137 балл жинаған Түлкібас ауданының оқушысы Сүйрік  Қасым болса, 135 баллды Ордабасы ауданының оқушысы Лаура Мұратбек мен Түлкібас ауданының оқушысы Аружан  Меирбек жинады. Тестілеуге кіргізу кезінде ҰБТ қағида талаптарының бұзылуы орын алмады. Барлық мектеп бітірушілер арнайы рамалы металіздегіштер арқылы өткізіліп, ұялы телефондары алынды», – деді Ардақ Мәдіханқызы.

Сүйрік  Қасым Түлкібас ауданы,  С.Бреусов атындағы жалпы орта мектебінің бітірушісі. 

Ардақ Мәдіханқызының айтуынша, облыста 15 ҰБТ өткізу пункті бар. 16 онлайн трансляцияға үлкен экрандар орнатылған. ҰБТ өткізу пунктеріне түлектерді тасымалдау, жатын орындарын дайындау және тамақтандыру басқарма тарапынан қамтамасыз етіліп отыр. Қазіргі таңда 100 балдан жоғары жинағандар – 766 (20,9%) оқушы.  Бүгін 21 маусымда 4 ауданда өткізілуде. Оған 1914 бала қатысып жатыр.

Сондай-ақ, өңірдегі мұғалімдерді аттестациядан өткізу жұмыстары жайлы баяндаған Ардақ Садықова мұның бәрі сыбайлас жемқорлықтың алдын алу мақсатында жасалынып жатқанын жеткізді.

«Түркістан облысы көлемінде 2019 жылғы жазғы мезгілде 13004 мұғалім тестілеуден оң қорытынды алып, аттестаттаудың екінші кезеңіне келді. Сондай-ақ, сыбайлас жемқорлықтың алдын алу мақсатында педагогтарды аттестаттауының екінші кезеңін автоматтандыру бойынша пилоттық жоба басталды. Пилоттық жобаны іске асыру мақсатында jumys.sitcen.kz порталында арнайы аттестация бөлігі ашылды», – деді ол.

Порталмен жұмыс жүргізу ережесі облыс педагог қызметкерлеріне таныстырылуда. Бұл жұмыстардың қорытынды нәтижесі жоғары болады деп күтілуде.