Қазақстанда 300 мыңдай мұғалім бар

Қазақстанның Білім және ғылым министрлігінің мәліметіне сәйкес, Қазақстанда 289 851 мұғалім жұмыс істейді.

Қазақстанда 300 мыңдай мұғалім бар
интернеттен алынды
Жоғарыда айтқандай, Қазақстанда 289 851 мұғалім бар. Оның ішінде жекеменшік мектептерде - 3303, арнайы жалпы білім беретін мектептерде – 3014 және қалғаны мемлекеттік мектептерде білім береді екен.

Бүгін, қазан айының алғашқы жексенбісінде елімізде мұғалімдер күні аталуда. Осыған орай, Мемлекет басшысы Қасым-Жомарт Тоқаев әлеуметтік желі арқылы барлық мұғалімді кәсіби мерекемен құттықтады.

«Ұстаздар - балаларға білім беріп, ұрпағымызды отаншылдық рухында тәрбиелейтін керемет жандар. Еліміздің лайықты азаматтары - мұғалімдерге әрқашан қолдау көрсетеміз», - деді ҚР Президенті.

Мұғалімдер күні - білім саласындағы қызметкерлердің кәсіби мейрамы. Бұл күн 1965 жылы 29 қыркүйекте КСРО Жоғарғы Кеңесі Президумының Бұйрығымен қазанның алғашқы жексенбісіне белгіленген. Қазіргі уақытта Қазақстан, Әзербайжан, Беларусь, Қырғызстан, Латвия және Украина Мұғалімдер күнін қазанның алғашқы жексенбісінде тойлайды.