«Алтын», «Күміс алқалы» аналар оқу үшін арнайы квота бөлінеді

Бұдан былай «Алтын алқа» және «Күміс алқа» алған аналарға еліміздің жоғары оқу орындарында білім алуы үшін арнайы квота бөлінбек.

«Алтын», «Күміс алқалы» аналар оқу үшін арнайы квота бөлінеді
Фото: e-kyzylorda.gov.kz

Білім және ғылым министрі Асхат Аймағамбетовтің айтуынша, көпбалалы аналарға жоғары білім алу үшін арнайы квота бөлінеді.

— Халықтың әлеуметтік аз қамтылған тобын қолдау мақсатында «Алтын алқа», «Күміс алқа« иелеріне білім грантын тағайындау бойынша квота қарастырылады. Бізге көпбалалы аналарды өнімді жұмылдыру қажет деп отырмыз. Егер мұндай ниет танытқан адамдар болса, онда олар оқуға түсе алады. Ұлттық бірыңғай тест тапсыруы, шекті балл алуы қажет. Дегенмен, олардың квотасы болады және қандай да бір жеңілдетілген шарттармен жоғары оқу орындарына түсуге мүмкіндік алады. Бұл ретте онлайн оқу бойынша да норма бар, — деді министр Асхат Аймағамбетов.