«Сергек» істен шыққан камераның айыппұлдарын жүргізушілерге қайтаратын болды.
Желтоқсан айының басында жылдамдықты бұзғаны үшін айыппұл тағылған хабарламалар Өскемен облыс орталығының автокөлік иелеріне жаппай келе бастаған. Сөйтіп, көлік иелері ешнәрсе бұзбағандықтарын мәлімдеген. Ақырында ел арасында осыған байланысты наразылық туындады.
Соған байланысты компания камералардың жұмысын тексеріп, олардың шынымен дұрыс істемей тұрғаны анықталды. Сөйтіп, бейнебақылау жүйесін жасаушылар қатені мойындап, төленген айыппұлдарды иелеріне қайтаратынын мәлімдеді.
– Бұл ақауларды бірқатар объективті себептерге байланысты әу басынан анықтай алмадық. Бірақ қазір мәселе толығымен шешілді. Заңсыз ескертулер алған барлық жүргізушіге қоңырау шалып, ақшаны қайтару тәртібі түсіндірілді, – дейді «Көркем Телеком» филиалының директоры Алексей Снегур.
Оның айтуынша, ешкімге ештеңені дәлелдеу немесе сотқа жүгінуге қажеті жоқ. Бұндай іс әлі болмаған. Сондықтан заңсыз айыппұлды төлегендердің төлем картасына не болмаса есепшотына компания бюджетінен аударылады.
Айта кетерлігі, соңғы кезде Өскемендегі «Сергек» камераларына көңіл толмаушылық жүргізушілер арасында ғана емес, көпқабатты үйдің тұрғындарында да бар.
