Нұр-Сұлтан қаласының әкімі Алтай Көлгінов Орталық коммуникациялар қызметіндегі баспасөз мәслихатында үлескерлер мәселесін айтты.
Оның айтуынша, үлестік құрылыстағы негізгі проблемалар — заңсыз құрылыс салушылармен және пайшылардың арасындағы соттың күрделігі, жобалық-сметалық құжаттама және сараптама, қаржылық және техникалық аудиттің болмауы.
«Біз күн сайын әріптестерімізбен бірге проблемалық тұрғын үй кешенінің орнына барып, үлескерлермен кездестік. Барған тұрғын үй кешендерінің жағдайын толықтай көріп, бағаладық. Нысандардың құрылысы әр түрлі сатыда еді. Тек қазаншұңқыры бар, іргетасы қаланбаған үйлер де болды. Бір пәтерді екі адамға сатқан жайттар да кездесті. Жұмыс көп. Әрбір нысан бойынша жұмыстар атқарылып жатыр. 32 тұрғын үй кешенінің 26-сы бойынша аудит жүргізіп, 13-і бойынша жобалық-сметалық құжаттаманы әзірлеп, мемлекеттік сараптаманың оң қорытындысын алдық. 19 нысанның жобалық-сметалық құжаттамасы әзірлеу және түзету сатысында. Биылғы жылы айтарлықтай өзгерістер орын алды және жыл қорытындысы бойынша 10 тұрғын үй кешені қолданысқа беріледі. Бұл 2,5 мың үлескері бар 11 үй. Оның ішінде аса күрделі нысан — Комфорт де Люкс. 2 мың үлескердің проблемасы шешіліп, пайдалануға берілді. «Нұрлы Жер« бағдарламасына өзгерістер енгізілді, бұл инвесторларды іздестіруді жеңілдетуге және құрылыс жұмыстарын жеделдетуге мүмкіндік берді», — деді Алтай Көлгінов.
Әкімнің атап өтуінше, мұнан басқа, 30-дан аса проблемалық нысан, яғни 10 мыңнан астам үлескер «Нұрлы жер» бағдарламасы бойынша қаржыландырылады. 15 нысанды әкімдіктің көмегімен үлескерлердің өздері салып жатыр.