Сенатта қасақана жасалған қылмыстар үшін жауаптылықты күшейту мәселесі қаралды, — деп хабарлайды «Қазақпарат».
Сенаттың Конституциялық заңнама, сот жүйесі және құқық қорғау органдары комитетінің кеңейтілген отырысында қылмыстық және қылмыстық-процестік заңнаманы жетілдіру мәселелері бойынша заң жобасы талқыланды.
«Заң жобасының бірінші блогы Мемлекет басшысы Қасым-Жомарт Тоқаевтың тапсырмасын қамтиды. Олар жекелеген қасақана қылмыстар үшін жауаптылықты қатайту туралы. Атап айтсақ, ұрлық, зорлау, есірткі тарату, браконьерлік, мас күйінде көлік жүргізуге байланысты болып отыр», – деді ҚР Бас прокурорының орынбасары Марат Ахметжанов. Ол сондай-ақ ұрлық та ауыр қылмыстар қатарына жатқызу мәселесі қаралғанын айтты.
«Заңсыз есірткі айналымы үшін заңнама талаптары күшейтіледі. Электронды ақпарат ресурстары арқылы есірткі тарату, есірткіні насихаттау мен жарнама үшін қылмысқа жауапкершілік артады», – деді М. Ахметжанов.
Сонымен қатар заңсыз аң аулауға тосқауыл қою мәселесі де басты назарда болатынын айтты.