Оралда әйел 5 жасар қызын қылқындырып өлтірген әйелге қатысты шешім шықты, — деп хабарлайды «Қазақпарат».
Судья Бақыт Ермахановтың айтуынша, қайғылы оқиға өткен жылы 12 желтоқсан күні Оралда болған. Шизофрениямен ауыратын 1983 жылғы Зәмзагүл Ермұханова өз үйінде 2013 жылғы қызы Айару Жұмағалимен бірге сабақ тапсырмаларын орындаған.
Содан кейін қызы «Кеттік, жата тұрайық» деп өтінген. Төргі бөлмеде төсекте жатқан кезде анасына еркелеп айтқан «емем» деген сөзін көтере алмай, Зәмзагүл қызын екі қолымен мойнынан қылғындырып өлтірген.
Сотталушының заңды өкілі, анасы Әсемгүл Жексенова қызының оғаш қылықтарын 17 жасында байқағанын, оған кезінде мән бермегенін айтты.
З.Ермұханованың өз қызын қасақана өлтіргені заңды өкілі мен куәлердің сотта берген жауаптары, сараптама қорытындыларымен және іс құжаттарымен толық дәлелденді.
Дерекөздің жазуынша, оның қылмысты есі дұрыс емес күйінде жасағаны анықталды. З.Ермұханова психиатриялық мекемеде жатқандықтан, сот талқысы оның қатысуынсыз жүргізілді.
Сот қаулысымен З.Ермұханова ҚР ҚК 99-бабы 2-бөлімі 14-тармағында көзделген іс-әрекетті есі дұрыс емес күйінде жасаған деп танылып, қылмыстық жауапкершіліктен босатылды.
Оған интенсивті бақылайтын мамандандырылған психиатриялық стационарда мәжбүрлеп емдеу тағайындалды. З.Ермұхановаға психикалық көмек көрсетуге тиісті медициналық ұйымға орналастыру жөніндегі қауіпсіздік шарасы өзгеріссіз қалдырылды.
«Кешенді стационарлық сот-психиатриялық сараптамаға сәйкес Зәмзагүл Ермұханова қылмысты жасағанға дейін де, одан кейін де, қылмысты жасаған кезде де шизофрения түріндегі психикалық ауытқумен ауырған», — деді судья Б.Ермаханов.
Тергеу шығындары да мемлекет есебіне жатқызылған. Себебі, заңды өкілдің (айлық жалақысы – 50 мың теңге) оны өтеуге шамасы келмейді.