Туризм агенттіктерінің хабарлауынша, жаңа жылды қарсы алуға Қазақстаннан мыңдаған жолаушы шетелге аттанады. Оливье салатынан, мандариннен, жаңажылдық фильмдерден, сағат түнгі он екіні соққанда Мемлекет басшысының тілегін тыңдап, отшашу тамашалаудан жалыққан жерлестеріміз көбінесе Хайнань, Малайзия, Гоа, Таиланд пен Біріккен Араб Әмірліктеріне барады екен. Әрине, қалтасы көтеретіндер ғана. Ал жалпы әлем жұртшылығы қай жерді таңдайды?
Скандинавия. Скандинавия түбегінде Аяз атаны Йоулу Пукке деп атайды. Бұл фин тілінен аударғанда «Жаңажылдық ешкі» деген мағына білдіреді. Сондықтан Скандинавия елдерінде ашық хаттар мен кәдесыйларда сәнделген ешкінің суреті бейнеленеді. Алты ай қыс жататын өлкеде жаңа жылды кез келген жерде қарсы алуға болады. Паром, қонақүй, мейрамхана, түнгі клуб, қала сыртындағы коттедждерде ойын-сауық бағдарламалары ұйымдастырылады. Ел көремін, жер көремін деушілерге арнайы экскурсиялар жоспарланған. Шопингке де көп жеңілдік бар.
Чехия. Чехияда жаңа жылды қарсы алсаңыз, естен кетпес ерекше әсерге бөленесіз. Чех халқы қос мерекені – Сильвестр әулие күні мен жаңа жылды ду-думанмен, у-шумен атап өтеді. Кейбір туристер арнайы яхтаны жалға алып, Влтава өзеніне круиз жасайды. Сол жерден Праганың көркіне көз суарады. Праганың Старомест алаңына жиналатын жұрттың да қарасы мол. Қоңырау соғылған соң адамдар құшақтасып, бір-бірін құттықтап, билеп, ән шырқайды. Содан кейін Яна мүсініне қол тигізеді. Ол арман-тілекті орындайды-мыс.
500 000 теңгеге татитын демалыс.
Мысыр. Египетте 31 желтоқсаннан 1 қаңтарға қараған түні жаңа жылды тойлау дәстүрі етек алмаса да, туристер мерекесіз қалмайды. Ең таңдаулы қонақүйлер мен мейрамханалар ойын-сауық бағдарламасын ұйымдастырып, танымал жұлдыздарды шақырады. Қызыл теңіз жағасындағы демалыс орындарында анимациялық қойылымдар мен би кештерін ұсынады. Египетте кез келген адам су астында жүзу өнерін оңай меңгеріп кете алады. Сондай-ақ Ніл өзеніне саяхат жасауға болады. Өзен жағасындағы көне ескерткіштер мерекелік көңілді көтере түседі.
Таиланд. Сиам егіздері мен көгілдір көзді сиам мысықтарының отаны бір ғасырдан бері әлем халқын магнитше тартып келеді. Бір барған адам тұрақты қонаққа айналады. Таңғажайып патшалықтың құпиясы неде? Біріншіден, аса бай мәдени мұра, өнер, сәулет ескерткіштері, екіншіден, жергілікті жұрттың жарқын жүзі, ашық мінезі, шуға толы көше базарлары, ертегідегідей ескі қалалар, заманауи қонақүйлер, сервистің жоғары деңгейі, өркениеттен қалыс қалған тайпалар, алып мұхит және тамылжыған табиғат... Сол себепті жаңа жыл есік қаққанда көптеген адам қақаған аяздан, күйбең тіршіліктен қашып, Таиландты жағалайды.
Үндістан (ГОА). Гоадағы мереке 25 желтоқсанда басталады. Орталық көшелерге сарғыш жалаушалар ілінеді, ал түнде үйлердің шатырында шырақ жағылады. Жаңа жылдың басты нышаны – боялған ағашты немесе жасанды қарақшыны өртеу. Адамдар оттан секіріп, ерлер мен әйелдер күш сынасады. Үнділер лакшми анадан байлық, Камадан махаббат тілейді. Үндістанда бұл кезде ауа температурасы +15 градустан түспейді. Саяхатшылар жанға жайлы ауа райында карнавалдар мен мерекелік іс-шараларға қатыса алады.
Біріккен Араб Әмірлігі. БАӘ жеті бірдей эмираттан тұрады. Олар: Әбу-Даби, Дубай, Шарджа, Фуджейра, Ум-Әл-Кувейн, Рас-әл-Хайм және Аджман. Жетеуі де бірінен-бірі өткен әдемі. Мереке қарсаңында ауа райы бір қалыпқа түседі. Сондықтан ыстықтан қорықпауыңызға болады. Туристер жаңа жыл түнінде құм үстінде шаңғымен сырғанап, көшпелі бәдәуилердің шаңырағында қонақ болады. Қарды қажет етсе, Дубайға сапар шегеді. Қаланың қақ ортасына алып тау-шаңғы кешені салынған.
Доминикан Республикасы. Жаңа жыл түнінде Кариб теңізінің жағалауы отшашудың астында қалады, көшелерді әсем әуен әлдилейді. Доминикан меймандарын экзотикалық тағамдар мен көңілді карнавалдар, ай жұлдызы жымыңдаған ашық аспан астында түнгі би кештері күтеді. Серфинг пен дайвингке құмар қауым Самана бұғазындағы киттерді тамашалайды. Ондағы қонақүйлерде бос орын бола бермейтіндіктен, ертерек қамданған дұрыс.
Индонезия (Бали аралы). Индонезияға саяхаттап барғандар Марко Поло, Фернандо Магелан мен Джеймс Куктың ізімен жүреді. Тұмса табиғат, тропикалық климат, өзендер, ақ құмды жағалаулары мерекенің көркін кіргізіп, Жаңа жылда адамның бойына күш-қуат құяды. Индонезияда бес күн тойланатын Жаңа жыл жергілікті ғибадатханалардан басталады. Одан кейін халық Ньепи, Нгембак мерекелерін атап өтеді. Адамдар бұл кезде бір-біріне қонаққа барып, өткен-кеткен кемшіліктері үшін кешірім сұрайды.
Мальдив аралы. Жаңа жылды у-шусыз қарсы алғысы келетіндер Мальдив аралын таңдайды. Онда кокос пальмаларының арасында серуендеп, таза мүйістерге шомылып, суасты өмірін зерттеп, жаңа піскен тропикалық жемістердің дәмін татады. Алқаракөк аспан, ыстық құм, шырақ жағылған дастарқандар мерекенің ажарын ашып, естен кетпес ерекше әсерге бөлейді. Жаңа жылда spa салондар да едәуір жеңілдік жасайды екен.
Әрине, жаңа жыл – отбасылық мейрам. Бұл түсінік санамызға мықтап бекіген. Дегенмен шешім қабылдау әркімнің өз еркінде. Жаңа жыл бақыт әкелсін!
Ерсайын БАҒДАТ