Қызылорда облысында қарасора өсіруге қатысты даулы істен кейін бірнеше полиция бастығы қызметінен айырылды. Бұл туралы ІІМ Өзіндік қауіпсіздік департаментінің басшысы Арман Саданов мәлімдеді.
«Қызылорда облысы ПД Есірткі қылмысына қарсы іс-қимыл басқармасының бұрынғы бастығы Мырзахасимов 15 жылға бас бостандығынан айырылды. Тергеу барысында ірі көлемде марихуана және әскери атыс қаруын сақтаған басқа тағы бір қылмыстық топ әшкереленді. Тінту кезінде 12 келіден аса есірткі табылып, тәркіленді. Сонымен қатар Қызылорда облысы ПД басқармасының бастығы мен қол астындағы қызметкері қылмыстық жауаптан жалтаруға көмектескені үшін жеті миллион теңге пара алып жатқан жерінен ұсталды. Іс бойынша тергеу амалдары жүргізіліп жатыр. Жақын арада іс сотқа жолданады», – деді А.Саданов. Оның айтуынша, іс бойынша айыпталушылар жұмыстан шығарылған. Ал Қызылорда облысы ПД басшысының орынбасары және тағы үш басшы қызметтен босатылды.Н.ҚОСАЙ