Жат жұртта құрықталып, елге мәжбүрлі түрде қайтарылған банкир Жомарт Ертаев сотта өзіне тағылған айыпты толық мойындады. Сот процесі қазіргі кезде Алматыда жүріп жатыр. Алдымен сотта айыптау актісі оқылды. Содан кейін сөз алған экс-банкир: «Айыбымды толық мойындаймын» деп мәлімдеді.
Жомарт Ертаевтың шала ісі ертегі желісіндегі «бір секірді құтылды, екі секірді құтылды, үшіншіде тұтылды» деген тәмсілге келеді. Ол 1,1 млрд доллар ұрлады деген күдікпен 2009 жылғы тамызда тұтқындалды. Бірақ айыптау бабы жеңіліне өзгертіліп, тоғыз ай отырғаннан кейін 250 АЕК немесе 378 мың теңге төлеп, бостандыққа шықты.
2013 жылы Альянс банк қаржы полициясына шағым түсіріп, банк үшін мүлдем тиімсіз шарттармен және еш кепілзат талап етпей Ж.Ертаевқа үлкен көлемде несие бергені үшін бұрынғы топ-менеджерлеріне қатысты тергеу жүргізуді өтінген. 2014 жылғы тамызда Ертаев негізгі қарызын және несие бойынша пайызды өтеуге банкке 2 миллион долларға жуық қаржыны қайтарды. Бірақ оның мерзімінде өтелмеген үш несиесі бар болып шықты. Олар да кепілзатпен қамтамасыз етілмеген.
2015 жылғы жазда Алматыда, «Алма ТВ» бас директоры жұмысын атқарған оны ұстауға мұздай қаруланған ведомствоаралық тергеу-жедел тобы шұғыл аттанады. Алайда тергеушілердің сау ете қалғаны туралы күзеттен хабар алған Ж.Ертаев сыртқы есік арқылы қашып кетеді.
Қазақстан оның қылмыстарын салмақтай келе, 2018 жылғы наурызда Жомарт Ертаевқа халықаралық іздеу жариялады. Сол жылғы 8 мамырда Интерпол сұрауымен Ресей құқық қорғау органдары Мәскеуде оның қолына кісен салды: солтүстік көрші Ертаевтың РФ азаматтығын немесе босқын мәртебесін беру туралы сұрауын қанағаттандырмай, 2019 жылғы наурызда Қазақстанға жолдады.
Жомарт Ертаев 2002 жылдан 2007 жылға дейін «Альянс банкі» АҚ-ның басқарма төрағасы болды. Бұған дейін аталған қаржылық ұйым «ЕртісБизнесБанк» деп аталды және ол онда 1998 жылдан бері басшылық қызметтер атқарған. 2007 жылы «Украинаның кредиттік сауда банкі» орнына құрылған «БТА банкі» бөлімшесін басқаруға аттанды. Артынша бір жыл өтпей, «Еуразиялық банктің» басқарма төрағасы болып, елге оралды. 2010 жы-лы Bank RBK АҚ директорлар кеңесінің кеңесшісі лауазымын иеленді. 2014 жылғы қарашада «Алма ТВ» бас директоры қызметіне қол жеткізген.
47 жастағы Ж.Ертаевтың алаяқтығына қатысты іс 700 томнан тұрады. Сот процесі Алматы қаласының қылмыстық істер жөніндегі мамандандырылған ауданаралық соты ғимаратында өтуде. Тараптардың дәлелдерін мұқият тыңдай келе, төрағалық етуші судья Роман Селицкий жақында үкім шығаруы тиіс.
Жомарт Ертаев өзге тұлғалармен келісіп, RBK банкінен 144 млрд теңге ұрлауды ұйымдастырды деп айыпталуда. Сотталушылар орындығында онымен бірге 37 адам отыр.