Айтып-айтпай не керек, доңыз жылы әлемде балалардың өлімі аз тіркелді. Сонымен бірге күн сайын таза суға қарық болғандар 200 мың, электр энергияға қол жеткізушілер 325 мың, ал интернет мүмкіндігіне ие болған бақыттылар саны 600 мың әлем тұрғынына артып отырды. Әлем халқының үлкендер арасындағы сауаттылар саны 90 пайызға жетсе, ауыр сырқаттар да едәуір азайған.
Еуропа ғалымдары жерден 50 миллион жарық жылы қашықтықта орналасқан күннен 6,5 миллиард есе ауыр Қара құрдымды фотоға түсіріп сенсация жасады. Ғалымдар бұл нысанның бар екенін болжағанымен, бұған дейін анықтай алмай келген еді. Мамандардың айтуынша, ең ірі қара тесік әзірше «ұйқыда жатыр», сондықтан да ол көршілес нысандарды әзірше жұтып алмайды. Оның айналасында жұлдыздар қазір емін-еркін жүр. Дегенмен ол кез келген уақытта «оянуы» мүмкін. Бұған дейін ғалымдар гравитациялық толқынның тіркелгенін хабарлаған еді. Ол екі қара тесіктің соқтығысуынан пайда болады. Бұл құбылыс әлемде қара тесіктің бар екенін дәлелдейді.