Құқық қорғау органдары қазақстандық қыздарды араб еліне сексуалды құлдыққа сату үшін құрылған арнаны жою операциясының егжей-тегжейін айтып берді. Сондай-ақ ІІМ Бахрейнде сексуалдық құлдықтың құрбанымен сұхбаттың бейнежазбасын жариялады.
2020 жыл соңында еліміздің Ішкі істер министрлігі адамдар саудасының халықаралық арнасын ұйымдастырған трансұлттық қылмыстық топты құрықтаған еді. Қаскүнемдер әлеуметтік аз қамтылған отбасылардағы, сондай-ақ материалдық қиындықтарға тап болған жас қыздарды алдап, өз дегендеріне көндіріп, оларды ары қарай сату және сексуалдық құлдықта ұстау үшін шекара арқылы Бахрейннің Манама қаласына жөнелткен. Бұл ретте араларында кәмелетке толмаған жасөспірімдер де бар болып шықты. Тірі тауарды жеткізу арнасын Қазақстанның, Ресейдің және Бахрейн корольдігінің азаматтарынан құрылған оннан астам адам жолға қойыпты. Қылмыстық топ өз құрбандарына шетелде жалақысы жоғары жұмыс ұсынып, қызығушылығын оятқан. Алайда қыздар Бахрейнге жеткеннен кейін бірден күңдікке түсіп, тәнін сатуға мәжбүрленген. Бір арна жабылғанымен, мұндай басқа да арналар болуы әбден мүмкін. Сондықтан полиция қыздарға шетелде біліктілікті талап етпейтін жоғары жалақылы қызмет ұсынатындарға сенбеуге шақырады.Ерік ЕРДЕНОВ