Шымкенттегі «Ынтымақ-2» шағынауданында 9-сыныптың оқушысы 42 жастағы азаматты өлтірді. Жасөспірім қолына ілінген таспен ересек адамды ұрып, сұлатып түсірген.
Қылмыс жөнінде хабарлама түскен таңғы уақытта полиция қызметкерлері оқиға орнына келіп, мәйітті қарау барысында марқұмның бет сүйегі сынғанын, басының оң жақ бөлігі зақымданғанын анықтайды. Қылмыстық кодекстің 99-бабы бойынша қылмыстық іс қозғалды. Жедел іздестіру шаралары барысында қылмыс жасауға қатысы бар деген күдікпен Шымкент қаласы №55 орта мектептің 9-сынып оқушысы ұсталды. Жасөспірім кісі өлтіргенін мойындады. Мектеп оқушысының қатыгездікпен кісі өлтіру дерегі бойынша әзірше не мектеп басшылығы, не білім саласына жауапты басқарма басшылығы тарапынан түсініктеме берілген жоқ. Бас прокуратураның Құқықтық статистика және арнайы есепке алу жөніндегі комитетінің дерегі бойынша, 2020 жылы Шымкент қаласында кәмелетке толмағандар 151 қылмыстық құқықбұзушылық жасаған. Оның ішінде мектеп оқушыларының қатысы бар қылмыс саны – 89. Кәмелетке толмағандар жасаған қылмыстық құқықбұзушылық ретінде көбіне ұрлық, бұзақылық, топтасып төбелесу, дене жарақатын салу деректері тіркеліп отырса, биылғы жылды жасөспірімдер кісі өлтіруден бастап отыр.Назгүл НАЗАРБЕК, Шымкент қаласы