Бүгінгі күн – болашақтың сұлбасы. Қазір қолға алатын әрбір ісіміз болашақтың берік іргетасы болып қаланары анық. Дана халқымыз «Игі істің ертеңі жақсы» деп бекер айтпаса керек. «Nur Otan» партиясының Төрағасы Нұрсұлтан Назарбаев та 14 қаңтар күні өткен Парламент Мәжілісіндегі партия фракциясының отырысында дәл осы ойды меңзеген болатын.
Елбасы жаңа шақырылымдағы депутаттар алдында тұрған басты міндет – ел сенімін ақтау екенін жеткізіп, бірқатар тапсырмаларын тілге тиек еткен болатын.
«Біз жұртшылықтың сенімін ақтауымыз керек. Бұл – өте маңызды міндет әрі үлкен жауапкершілік. Сондықтан біздің партиямыздың сайлауалды бағдарламасында айқындалған міндеттерге қол жеткізу үшін фракция депутаттары барын салуға тиіс», – деді Н.Назарбаев.
Шын мәнінде, өткенімізді саралап, жеткен жетістіктеріміз бен кеткен кем-кетіктерімізге көз жүгіртсек, көп нәрсенің парқын түсінуге болады. Елдің тұрақты дамуы мен халқымыздың әл-ауқатын арттыруға жасалған әрбір қадамның өзіндік тарихы мен өшпес ізі бар. Бұл тарихи қадамдар мен нәтижелердің артында дәл осы халық сенімі тұрғаны да жасырын емес.
Тарих демекші, биыл еліміз Тәуелсіздігіміздің 30 жылдығына аяқ басты. Атаулы мерейтойдың бағасы зор, мәні биік. Әсіресе, билік пен халық арасындағы алтын көпір болуға ұмтылған «Nur Otan» партиясы үшін бұл осы уақытта атқарылған істерге тарихи баға берудің, алға тағы бір қадам жасаудың таптырмас мүмкіндігі.
Өткен жылдар ішінде Қазақстан саяси ұстанымының, тұрақтылығының арқасында барша әлемге өзінің қауқарын дәлелдеді. Біздің азаматтар осы уақыт аралығында ғылымның, спорттың, өнердің, білім мен медицинаның әр саласында бірқатар жетістікке жетті. Бар күшімізді сала отырып, жан-жақты дамыдық, жетілдік. Алдағы мақсат осы жетістіктерді бекіте түсу, әлемнің саяси алаңында қол жеткізген орнымызды сақтап, нығая түсу.
Парламент Мәжілісіндегі ең үлкен фракция – «Nur Otan» партиясының мүшесі ретінде біз, депутаттар алдағы уақытта өзімізге жүктеліп отырған міндеттерді тереңнен түсініп, артылған жауапкершіліктің жүгін түйсінуіміз керек.
Бұл тұста, партия Төрағасы Н.Назарбаев 14 қаңтар күні өткен жиында біздің алдымызда тұрған бірқатар міндетті қадап айтқан болатын.
«Фракцияның тиімді жұмысын қамтамасыз ету үшін бірнеше міндетті шешкен жөн. Біріншіден, депутаттар Үкіметпен бірлесе отырып, жұртшылық тарапынан қолдау тапқан партияның сайлауалды бағдарламасының нәтижелі жүзеге асырылуын қамтамасыз етуі керек. Екіншіден, депутаттар бюджет қаражатының тиімді жұмсалуына бақылауды күшейтуге тиіс. Үшіншіден, барлық әлеуметтік топтармен кері байланысты нығайтқан абзал. Депутаттар тұрақты түрде тұрғындармен кездесіп, азаматтарды қоғамдық қабылдауларда қабылдап отыруы қажет», – деген еді.
Толығымен қолдауға лайықты әрі өте орынды талап деп санаймын. Біздің негізгі миссиямыз да – осы. Расымен, «Nur Otan» партиясы ең әуелі сайлауалды бағдарламасын оңтайлы жүзеге асыруы керек. Себебі оның артында бізге дауыс берген халықтың зор сенімі, болашаққа деген үміті жатыр. Бұл сенімді аяқасты етпеу үшін, халықтың үміті мұқалмас үшін көп тер төгуіміз қажет болады.
Бюджет қаражатының тиімді жұмсалуы – халқымыздың әл-ауқатын арттырудағы аса маңызды шешімдердің негізгісі. Ел экономикасының гүлденуіндегі, бизнестің «жетіле» түсуіндегі, жолдар мен инфрақұрылымның, медицина мен ғылымның өз деңгейінде дамуындағы түрлі түйткілдерді шешу үшін де бюджет тиісінше үйлестіріліп, сәйкесінше жұмсалуы тиіс.
Бұдан бөлек, біз халықпен кері байланыс орнатудың да тиімділігін көріп отырмыз. Қазір оған мүмкіндік көп. Түптеп келгенде, әлеуметтік желілер мен жаңа медианың дамуы еліміздің түкпір-түкпіріндегі әрбір азаматпен тікелей байланыс орнатып, проблемалық мәселелерін тыңдауға мүмкіндік беріп отыр. Мұның өзі алға қойған мақсаттарымызға қол жеткізудегі басты тетік екенін ұмытпаған абзал. Кері байланыс орнату билік пен халық арасындағы ашықтықты қамтамасыз етеді.
Сол себепті Партия Төрағасы ретінде Елбасының бізге жүктеп отырған міндеттері мен берген тапсырмалары үлкен тиянақтылықпен ойластырылған десем артық айтқандық емес. Осы тұрғыдан алғанда, халық сеніміне селкеу түсірмеу – бізге сын.
