1 наурыз – «Nur Otan» партиясының құрылған күні. Оның қалыптасу және даму тарихы Қазақстанның Тұңғыш Президенті – Елбасы, «Nur Otan» партиясының Төрағасы Нұрсұлтан Назарбаевтың есімімен тығыз байланысты. Олай дейтін себебіміз, Елбасының тікелей басшылығымен партия жетекші саяси күшке ие болды. Бүгінде нұротандықтар Елбасы тапсырмасына сәйкес партия қызметін жаңғырту жұмыстарын қарқынды түрде жүргізіп келеді.
Еліміздің тәуелсіздік жылдарындағы әрбір жетістігі, құнды шешімдер мен заңдардың қабылдануы «Nur Otan»-ның қатысуымен өтті. Партия Төрағасының бастамасымен жетекші ұйым уақыт талабына сай жаңару жолына түсіп, жаңа белестерді бетке алып келеді. Нақтырақ айтқанда, бүгінге дейін «Nur Otan» партиясының бастамасымен көптеген ауқымды шара ұйымдастырылды. Алдағы уақытта да бұл шаралар жалғасын таба берері сөзсіз. Басқасын айтпағанда, 2019 жылдың өзінде партияның екі бірдей съезі өтті. Сондай-ақ «Nur Otan»-ның 20 жылдық мерейтойы тойланды. Ал маусым айында Президент сайлауында «Nur Otan» партиясының кандидаты Қасым-Жомарт Тоқаев жеңіске жетіп, Президент атанды. Мұның өзі партияның ел алдындағы асқақ беделін көрсетті. Саяси кеңес кезінде сөйлеген сөзінде Елбасы партия жұмысын жаңғырту жөнінде айтып, «Nur Otan»-ның халықты алға жетелеуші ұйым екеніне ерекше тоқталды. – Партиямыздың дамудың жаңа кезеңіне қадам басқанын бәріміз түсініп отырмыз. «Nur Otan» еліміздің жетекші күші ретінде саяси басшылықты бекемдеп, стратегиялық бағыттан ауытқымауы үшін бүкіл қоғамды жұмылдыруы тиіс. Бұл – бос айтылған сөз емес. Біз – Қазақстанның, халықтың ортасындағы елді алға жетелейтін ұйымбыз. Егер ондай маңызды міндеттің үдесінен шыға алмасақ, орнымызды басқа партия басады. Сондықтан жауапкершілікті барынша сезінуіміз керек. 2050 жылға дейін қабылданған бағдарламада Қазақстанның дамыған 30 елдің қатарына қосылуын мақсат етіп қойдық. Барлық бағдарлама осы меженің төңірегінде тоқайласады, – деді партия Төрағасы.Жетекші ұйымның әлеуеті артты
Елбасы сондай-ақ «Nur Otan» партиясының әрқашан проблемаларды нақты шешу жолдарын ұсынып, тиімді жұмыс істеуі керек екенін тілге тиек етті. Бұл ретте Нұрсұлтан Назарбаев партияның жұмысын жүйелі жаңғырту бағдарламасын ұсынып, оны «Сенім. Диалог. Болашаққа нық қадам – «Nur Otan» партиясының 7 серпіні» деп атады. Тұңғыш Президент бірінші кезекте партияның белсенді мүшелерін топтастыруға мән берді. Яғни, қоғамдық мәселелерді ұдайы көтеріп жүрген, оны шешудің жолдарын ұсына білетін, өз сөзін дәлелдей алатын азаматтарды партияға тартудың жайын қозғады. Халықпен тығыз қарым-қатынаста жұмыс істеуде белсенділік танытпағандар партияның мүшелігіне лайық емес екені айтылды. Соның арқасында партия мүшелерінің қоғамда болып жатқан жағдайларға немқұрайды қарамай, дер кезінде үн қатуы, нақты шара қолдануы назарға алынды. Партия жұмысындағы ашықтықты қалаған, жетекші ұйымның әлеуетін барлық жерде арттыруды көздеген Елбасы Мәжілістегі фракцияның жұмысын күшейтуді қолға алды. Бұл – партия міндеттерін орындаудың және атқарушы органдарға ықпал етудің негізгі тетігі екені айқын. Ал фракция өз деңгейінде жұмыс істесе, оның беделі де жоғарылайтыны белгілі. Партия Төрағасы сонымен қатар халықпен жұмыс істеудің нақты бағытталған ұстанымын енгізуге баса мән берді. Соның арқасында егде жастағы адамдарға арналған орталықтар құруға жол ашқан «Ардагерлерді ардақтайық» жобасы, көпбалалы аналарға қолдау көрсеткен «Бақытты отбасы» орталықтары сияқты бастамалар көптеп іске асырылып жатыр. Одан бөлек, Елбасы партия төңірегіне жастарды біріктіру үшін шаралар қабылдауды ұсынған еді. Ауыл жастарымен жұмыс істеуді де негізгі міндеттердің бірі санады. Бұл ретте «Ауыл – ел бесігі» жобасын әзірленді. Жалпы, бұл жобаның мақсаты – ауыл жастары үшін жұмыс орындарын ашу, оларды ауылда тұрақтандыру болды. Қазір Үкімет осы мәселелермен айналысып, тиісті шараларды қолға алынуда.Нақты істер партиясы
Елімізде жарияланған төтенше жағдай кезінде де Тұңғыш Президент Нұрсұлтан Назарбаев Birgemiz қоры арқылы еліміздің шағын қалалары мен ауылдарындағы мұқтаж адамдарға қолдау көрсету туралы тапсырма берді. Бүгінде Елбасы тапсырмасына сәйкес аталған жұмыстар қарқынды түрде жүргізілуде. Осыған байланысты партия Лидерінің «нағыз патриоттардың, жауапкершілігі мол жас көшбасшылардың жаңа буыны қалыптасқаны қуантады» деген сөзін атап өтпеске болмайды. Расымен де, көптеген азамат #BizBirgemiz акциясы асында қайырымдылық іс-шараларына қатысып, белсенділік танытты. Бұл ретте волонтерлердің еңбегі орасан зор. «Nur Otan»-ның нақты істердің партияcы екенін айғақтайтын тағы бір көрсеткіш – ол әрине аймақтардағы қоғамдық қабылдау бөлмелерінің жұмысы. Cоңғы кездері қоғамдық қабылдау бөлмелерінің көмегіне жүгінген тұрғындар саны да айтарлықтай арту үстінде. Бұл азаматтардың партияға деген сенімінің күшейе түскенін аңғартады. Қазір «Nur Otan» партиясы Елбасы тапсырмасына сәйкес партия қызметін жаңғырту жұмыстарын қарқынды түрде жүргізуде. Осы мақсатта бірқатар жоба қолға алынды. Әсіресе, партияны заманауи, бәсекеге қабілетті, тиімді, жоғары технологиялы саяси ұйымға айналдыру көзделді. Дүйім жұрттың алғысын арқалаған партиялықтардың аталған игі бастамасы қашанда халық қолдауына ие. Сондай-ақ бүгінде партияның сайлауалды бағдарламасының орындалу барысы да жіті бақылауға алынды. Мұның бәрі халықтың партияға деген сенімін нығайту үшін жасалып отырған ауқымды жұмыстардың бір парасы ғана. Келешекте бұдан өзге де игі іс-шаралар жалғасын таба бермек. Ал өткен жылдағы ең айтулы шаралардың бірі – барлық деңгейдегі мәслихаттар мен Парламент Мәжілісіндегі тиімді депутаттық корпусқа жаңа көшбасшыларды айқындау мақсатында өткен партияішілік праймериз болды. Айтулы науқан ел ішіндегі белсенді, іскер азаматтардың өздерін көрсетіп, идеяларын таныстыруына, жаңа жақтастар мен достар табуына жол ашып берді. Қорыта айтқанда, партияішілік іріктеудің еліміздегі саяси мәдениетті дамытудағы, азаматтық белсенділікті арттырудағы маңызы зор болды. Елбасы әрқашан «Nur Otan» партиясының алдына кез келген уақыт сынағына сай жедел және сапалы жауап беру міндетін қойып отыр. Сол арқылы партия әрқашан күрделі мәселелердің оңтайлы жолын тауып, тиімді шешімдер қабылдап келеді. Осы орайда Елбасының «Біздің басты міндетіміз – тұрақтылық, Қазақстанның өсіп-өркендеуі және қарапайым азаматтардың әл-ауқатын жақсарту. Сондықтан уәделерімізді орындау үшін бар күш-жігерімізді жұмсауымыз қажет», – деген сөзі еске түседі. Халқымыздың өмір сүру сапасы мен әл-ауқатын арттыруға, елдің экономикалық әлеуетін нығайтуға, қоғамның тұрақтылығын сақтауға бағытталған партия Лидері Нұрсұлтан Назарбаевтың бастамалары үлкен мүмкіндіктерге жол ашады деген сенімдеміз. Қазақстанда жүргізіліп жатқан ауқымды, саяси және әлеуметтік-экономикалық реформаларды жүзеге асырушы партия 22 жылдық тарихи қалыптасу кезеңінде үлкен жетістіктерге жетті. Алдағы уақытта да еліміздегі жетекші партияның биік белестерді бағындырарына сенім мол.Әбілмансұр ЖАСАН