Ақтау қаласының тұрғыны М.Мельников есімді азамат былтыр заңсыз жұмыстан шығып қалғанына шағымданып жүр. Оқиғаны қысқаша баяндай кетсек, М.Мельников пен Маңғыстау облысының футбол бойынша Олимпиадалық резервке мамандандырылған балалар мен жасөспірімдер мектебі арасында 01.01.2019 жылдан 31.12.2019 жылға дейінгі мерзімге дейін еңбек шарты жасалған. Содан кейін Еңбек кодексінің 30-бабы, 2-тармағына сәйкес еңбек шарты 31.12.2020 жылға дейін ұзартылған. Бірақ осы аралықта аталған жұмыс орны Еңбек кодексінің 51-бабына сәйкес М.Мельниковке заңмен көзделген мерзімде еңбек қатынастарының тоқтатылуы туралы хаттама жіберген.
Осыдан соң азамат туындаған мәселе бойынша «Nur Otan» партиясының Маңғыстау облыстық филиалынан көмек сұраған. Партия өкілдері Маңғыстау облысының Дене шынықтыру және спорт басқармасының басшысын шақыртып, проблеманы шешу үшін нақты тапсырма берген болатын. Басқарма басшысының бұйрығымен жыл басында жұмысшы мамандар құрамымен комиссия құрылып, қызметтік тексеріс жүргізілді. Сонымен қатар арыз негізінде облыстық Еңбек барқармасына хат жолданды. Қызметтік жазбада баяндалған наразылықпен танысу үшін материалдар, еңбек шарттарының бұзылуы туралы хабарламалар, Мемлекеттік еңбек инспекциясы тарапынан ілеспелі материалдар сұратылып, жинақталған. Ақыры комиссия тексеру барысында Футбол бойынша балалар мен жасөспірімдер спорт мектебінің жаттықтырушысы М.Тәкеновтен және оның орынбасары Р.Алагузовтен түсініктеме алды. «Еңбек инспекциясы» мемлекеттік мекемесінің жауабына сәйкес, арызданушымен еңбек шарты заңсыз тоқтатылған және еңбек заңнамасының талаптарына сай келмеген екен. Осыған байланысты комиссия қорытындысы бойынша, М.Мельников бұрынғы жұмысына қайта орналасатын болды.Мадияр ТӨЛЕУ