Эпидемиологиялық ахуал матрицасына сәйкес Қазақстан 14 күн бойы жоғары қауіп аймағында, яғни «қызыл аймақта» тұр. Бұл туралы Орталық коммуникациялар қызметінде өткен брифингте Денсаулық сақтау бірінші вице-министрі Марат Шоранов хабарлады.
Тәуекелі жоғары аймақта («қызыл аймақта») 8 өңір бар: Нұр-Сұлтан және Алматы қалалары, Атырау, Батыс Қазақстан, Алматы, Ақмола, Қарағанды және Ақтөбе облыстары.
Бұл ретте Алматы және Нұр-Сұлтан қалалары қызыл аймақта бір айдан бері тұр, Батыс Қазақстан облысы - 24 күн, Атырау облысы – 3 апта, Ақтөбе және Алматы қалалары – 2 апта, Ақмола – 9 күн, Қарағанды – 8 күн. Орташа тәуекел аймағына («сары аймаққа») өткен аптада 4 өңір ауысты, бүгінде 7 өңір сары аймақта: Шымкент қаласы, Солтүстік Қазақстан, Жамбыл, Маңғыстау, Қызылорда, Қостанай, Павлодар облыстары. «Жасыл аймақта» - Түркістан, Шығыс Қазақстан облыстары.
«Сәуір айында эпидемиологиялық жағдай нашарлады. Сәуір айынан бастап 29 200 науқас тіркелді. Наурыздың сәйкес мерзімімен салыстырғанда сырқаттанғандар 2,8 есеге өскен, тәулігіне 2800 науқас тіркеледі. Қостанай, Солтүстік Қазақстан және Павлодар облыстарын қоспағанда, барлық өңірлерде сырқаттанудың артқаны байқалады. Бұл ретте ел бойынша сырқаттанудың 60%-ы 3 өңірге – Нұр-Сұлтан және Алматы қалалары мен Алматы облысына тиесілі», деді М.Шоранов
