Жітіқара қаласының 36 жастағы тұрғыны алдау арқылы жарты миллионнан астам теңгенің 6 онлайн несиесін рәсімдеді, деп хабарлайды Қостанай облыстық полиция департаментінің баспасөз қызметі.
«Былтыр жылдың соңында Жітіқара аудандық полиция бөліміне интернет алаяқтың құрбаны болған әйел шағымданды. Жітіқара қаласының 41 жастағы тұрғыны белгісіз біреу оның және жұбайының атына бірнеше несие рәсімдегенін баяндап берді», - деп хабарлады полициядан.
Жедел-іздестіру іс-шараларының барысында 36 жастағы ер адам анықталған. Тергеуде белгілі болғаны, ер адам туыстарының үйіне қонаққа келіп, олар туралы мәлімет жинаған. Одан кейін Алматы қаласындағы микронесие ұйымдарының бірінен 6 онлайн несие рәсімдеген.
Полиция күдіктіні ұстады. Қылмыстық іс «Алаяқтық» бабы бойынша тергелді. Сот шешімімен алаяқ 4 жылға бас бостандығынан айыру жазасына кесілді.
