Алматыда коронавирусқа қарсы вакцинаны діни бірлестік өкілдері де жаппай қабылдап жатыр. Жалпы, қалада ислам мен христиан дінін ұстанушылардан өзге 15 діни конфессия бар. Бірлестік өкілдерінің барлығы бір ауыздан вакцина салдыру ешбір дінге қайшы келмейтінін айтып отыр. Сондықтан сақтық шараларына түсіністікпен қарауды сұрап жүр.
– Қаладағы имамдар жайлап салдырып жатыр. Бізде вакцина салдыру жөнінде Қазақстан мұсылмандары діни басқармасының пәтуәсі шықты. Вакцина салдырудың қажеттілігі және вакцинаның оразаны бұзбайтыны жөнінде айтылды. Себебі вакцина азық болатындай тамырдан салынатын дәрі емес. Ол адамның бұлшық етіне салынатын, егілетін дәрі. Сондықтан ол оразаны бұзбайды, – дейді Алматы қаласының бас имамы Еркінбек Шоқай. Осы уақытқа дейін Алматыда 116 мыңнан аса адам екпе қабылдаған. Қазір қалада вакцина салатын 203 орталық жұмыс істеп тұр.М. ТӨЛЕУ