Мәжіліс депутаттары 2021-2023 жылдарға арналған республикалық бюджетке түзетулер енгізу жұмыстарына кірісті. Жұмыс тобының құрамында Палата жанынан құрылған Партияаралық кеңестің мүшелері де бар.
Мәжіліске «2021-2023 жылдарға арналған республикалық бюджет туралы» заңға өзгерістер мен толықтырулар енгізу туралы үкіметтік жоба таныстырылды. Заң жобасының таныстырылымы Палатаның Қаржы және бюджет комитетінде өтті. Іс-шараға депутаттармен қатар бейнеконференция байланысы арқылы мемлекеттік органдардың, Ұлттық банктің, «Атамекен» ҰКП, Қазақстан қаржыгерлер қауымдастығының өкілдері, сондай-ақ Мәжіліс жанындағы Партияаралық кеңестің мүшелері-Парламентке ұсынылмаған Adal, «Ауыл» және ЖСДП партияларының өкілдері қатысты. Отырыста республикалық бюджет параметрлерін нақтылау туралы Қаржы министрi Ерұлан Жамаубаев және Ұлттық экономика вице-министрі Азамат Амрин баяндады. Заң жобасын әзірлеушілердің түсіндірмелеріне сәйкес, бюджетті нақтылау шеңберінде «Nur Otan» партиясының сайлауалды тұғырнамасында белгіленген бірқатар міндетті шешу және Мемлекет басшысының Қазақстан халқына Жолдауларында айтылған басым бағыттарды іске асыру жоспарланып отыр. Сондай-ақ қосымша қаражат коронавирус инфекциясымен күресуге бағытталады. Елдің 2021-2025 жылдарға арналған әлеуметтік-экономикалық даму болжамы шеңберінде 2021 жылға арналған макроэкономикалық көрсеткіштерді нақтылау кезінде номиналды ЖІӨ 2021 жылы 77 869 млрд теңге көлемінде болжанады, бұл мақұлданған болжамнан 1 207 млрд теңгеге жоғары. Нақты ЖІӨ 103,1% деңгейінде болжанады. Жан басына шаққандағы ЖІӨ 9 655 мың АҚШ долларын құрайды. Бюджеттік заң жобасын талқылау Қаржы және бюджет комитетінің мүшесі Анатолий Бойчин бастаған жұмыс тобында жалғасады. Оның құрамына Мәжіліс жанындағы Партияаралық кеңестің де мүшелері кірді. Айта кету керек, Партияаралық кеңес бір ай бұрын Мәжіліс Төрағасы Нұрлан Нығматулиннің бастамасымен құрылды. Бүгінде кеңес мүшелері-Қазақстанда тіркелген барлық партияның өкілдері Мәжілістің қарауындағы заң жобалары бойынша жұмысқа қатысуда. Қазір Мәжіліс жұмысындағы өзекті заң жобаларының қатарында «Қазақстан Республикасындағы сайлау туралы» Қазақстан Республикасының Конституциялық заңына өзгерістер мен толықтырулар енгізу туралы, өнеркәсіптік саясат туралы заң жобалары, қашықтан жұмыс істеуді құқықтық реттеуді жетілдіру мәселелері бойынша Еңбек кодексіне түзетулер, өсімдіктер әлемі туралы, азаматтардың жекелеген санаттарын әлеуметтік қорғауға қатысты, бала құқықтарын қорғау мәселелері бойынша заңнамалық жаңалықтар және тағы басқалары бар. Парламенттік емес партиялардың өкілдері жер қатынастары мәселелері бойынша заңнамалық түзетулерді талқылауға белсене қатысты. Мәжіліс мұндай жұмыс нысаны заң шығару процесін тиімді, ашық және Мемлекет басшысы бастамашылық еткен «Халық үніне құлақ асатын мемлекет» тұжырымдамасымен үйлесімді етуге мүмкіндік беретініне сенімді.Ж.АСАН